DDU: Eýropada qysta keminde 500 myń adam koronavırýstan kóz jumýy múmkin

NUR-SULTAN. QazAqparat – Dúnıejúzilik densaýlyq saqtaý uıymynyń boljamy boıynsha qysta Eýropada keminde 500 myń adam koronavırýstan kóz jumýy múmkin. Bul týraly QazAqparat COVID-19 taralýyna jol bermeý jónindegi VAK telegram kanalyna silteme jasap habarlaıdy.

«Eger EO elderi pandemııaǵa baılanysty shekteýlerdi kúsheıtpese, bul boljam júzege asýy múmkin, - dedi DDU Eýropalyq bıýrosynyń dırektory Hans Klıýge. «COVID-19 kezekti ret bizdiń aımaqta ólim-jitimniń basty sebebi bolyp otyr, jańa tolqynnyń týyndaýy sýyq aýa raıynyń jaqyndaýyna, birqatar elderde vaktsınatsııanyń tómen qarqynyna jáne SARS-CoV-2 juqpaly shtamdarynyń paıda bolýyna baılanysty». Osyǵan oraı Avstrııada búginnen bastap jalpyulttyq lokdaýn engiziledi, Danııada kınoteatrlarǵa, túngi klýbtar men meıramhanalarǵa barý úshin kovıd-pasporttar mindetti bolyp tabylady.

Al Germanııanyń federaldy aımaqtarynda covid-19 ınfektsııasynyń taralý qarqyny báseńdeýde. Robert Koh ınstıtýtynyń málimeti boıynsha ótken táýlikte elde 42 727 koronavırýs ınfektsııasyna shaldyǵý jaǵdaılary tirkelgen, bir kún buryn bul kórsetkish 63 myńnan astam derekti qurady. SARS-CoV-2 ınfektsııasynyń rastalǵan jaǵdaılarynyń jalpy sany 5,5 mln-ǵa jýyqtady, naqtyraq 5 354 942-ge jetti. Sońǵy 24 saǵat ishinde 75 naýqas aýrý saldarynan kóz jumdy, al pandemııa bastalǵannan beri Germanııada 99 062 adam COVID-19 asqynýynan kóz jumdy.