DDU Eýropa bıýrosy Qazaqstanda medıtsınany damytýǵa $1,8 mln bóletin boldy
«Búgin qol qoıylǵan DDU-nyń Eýropalyq óńirlik bıýrosymen yntymaqtastyq týraly kelisimniń sheńberinde bizdiń densaýlyq saqtaýymyzdy damytýǵa 1,8 mln dollar bólý jóninde sheshim qabyldandy. Bul qarajat medıtsına qyzmetkerleriniń áleýetin arttyrý, analardyń, jańa týǵan nárestelerdiń, balalar men jasóspirimderdiń densaýlyǵyn saqtaý, onkologııalyq jáne basqa da juqpaly emes aýrýlarmen, AITV, JITS, týberkýlezben kúresý, medıtsına kadrlaryn oqytý, halyqpen aqparattyq jumys jáne basqa da baǵyttar úshin halyqaralyq uıym tarapynan saraptamalyq, ádisnamalyq jáne tehnıkalyq qoldaý kórsetýge baǵyttalatyn bolady", - dep málimdedi Densaýlyq saqtaý mınıstri Ajar Ǵınııat DDU Eýropa bıýrosynyń forým alańynda ótken brıfıngte.
Mınıstr ótken eki is-sharanyń – Densaýlyq saqtaý mınıstrleri, DDU sarapshylary, DDU Eýropalyq óńirine múshe 80-nen astam memlekettiń mamandary, sondaı-aq áriptes uıymdar men azamattyq qoǵam ókilderi qatysatyn MSAK jónindegi jahandyq konferentsııasy men DDU Eýropalyq óńirlik komıtetiniń 73-shi sessııasynyń erekshe mańyzyn atap ótti.
«Konferentsııaǵa qatysýshylar densaýlyq saqtaý júıesiniń negizi – MSAK-ty damytýdy qoldaýda yntymaqtasty. Delegattar MSAK bazalyq qyzmetterin keńeıtý, azamattardyń medıtsınalyq kómekke teń qoljetimdiligin qamtamasyz etý úshin ınvestıtsııalardy ulǵaıtý paıdasyna sóz sóıledi. Sondaı-aq eń bastysy memleket, úkimet basshylyǵynyń tarapynan joǵary saıası qoldaý qajet», - dep atap ótti A.Ǵınııat.
Mınıstr atap ótkendeı, bul alańda barlyq elderdiń densaýlyq saqtaý kún tártibindegi syn-qaterlerdi eńserý úshin mańyzdy sheshimder qabyldanýda.
«Prezıdent Toqaev MSAK boıynsha dostastyq elder koalıtsııasyn qurý týraly ınnovatsııalyq usynysty usyndy. Kóptegen elderde MSAK boıynsha jaǵdaı Qazaqstandaǵydaı jaqsy emes, olar negizinen qymbat tehnologııalarǵa ınvestıtsııalarmen shekteledi. COVID-19 pandemııasynan beri biz halyqty qorǵaý boıynsha eń jaqsy nátıjeni MSAK deńgeıi joǵary elder kórsetkenin túsinemiz», - dedi brıfıng barysynda DDU Eýropalyq bıýrosynyń dırektory Hans Klıýge.
Ol koalıtsııa qurý bastamasy kelesi jyly BUU Bas Assambleıasynyń otyrysynda talqylanatynyn aıtty.
Doktor Klıýge Qazaqstannyń densaýlyq saqtaý salasyndaǵy tsıfrlandyrý deńgeıine joǵary baǵa berdi, bul saladaǵy kadrlardyń jetispeýshiligi máselelerin sheshýge kómektesedi.
Ol Qazaqstanda psıhologtardy MSAK mamandary tobyna qosýǵa kóp kóńil bólinetinin atap ótip, psıhıkalyq densaýlyq – álemniń barlyq óńirlerinde jańa pandemııa ekenin atap ótti.
Jýrnalıstiń koronavırýs ınfektsııasy pandemııasynyń qaıtalanýy týraly suraǵyna H. Klıýge vaktsınatsııanyń, ásirese qys mezgiline jaqyn, qaýip tobyndaǵy adamdar, qarttar, sozylmaly aýrýy bar adamdar úshin mańyzyn atap ótti.
«Mine, men taǵy da halyqaralyq yntymaqtastyqqa oralǵym keledi, elder vaktsınany ózderi ázirlemeýi jáne ustamaýy kerek, olar bólisip, almasýy kerek. Dıagnostıka jáne emdeý – bul jerde DDU-nyń kúshti jumysy da mańyzdy, óıtkeni prezıdent Toqaev doktor Tedrospen kezdesýinde DDU-nyń densaýlyq saqtaý máselelerin jahandyq úılestire alatyn jalǵyz agenttik ekenin anyq aıtty. Endi biz kelesi jahandyq indetterge daıyn bolamyz dep senemin», - dedi DDU Eýropa óńirlik bıýrosynyń basshysy.