DDU anemııamen kúres baǵdarlamasyn jasap shyqty

ASTANA. QazAqparat – Anemııadan áıelderdiń 30%-y, júkti áıelderdiń 37%-y jáne 6 aıdan 5 jasqa deıingi balalardyń 40%-y zardap shegedi. Anemııaǵa ushyraǵandardyń kópshiligi tabys deńgeıi ortasha jáne tómen elderde turady, dep habarlaıdy QazAqparat «BUU Jańalyqtar qyzmetine» siltememen.

Osy aptada Ońtústik Afrıkanyń Keıptaýnynda ótken analar men sábılerdiń densaýlyǵyna arnalǵan halyqaralyq forýmda DDU anemııaǵa shaldyǵý deńgeıin tómendetý boıynsha alǵashqy keshendi baǵdarlama bastady.
Anemııa, sondaı-aq, qan azdyq dep atalatyn aýrý - qandaǵy gemoglobın men erıtrotsıtterdiń azaıýymen birge júretin jáne ottegi tasymaldanýynyń buzylýymen jáne gıpoksııanyń damýymen sıpattalatyn sındrom, ıaǵnı organızmdegi otteginiń tómendeýi.
Anemııa damýynyń eń kóp taraǵan sebepteriniń biri - temir tapshylyǵy, biraq anemııa úlken qan joǵaltý, tuqym qýalaıtyn buzylýlar, búırek nemese baýyr aýrýlary, juqpaly jáne onkologııalyq aýrýlarǵa baılanysty bolýy múmkin.
«Anemııaǵa qarsy kúres jumystarynyń basym bóligi temir tapshylyǵynyń aldyn alý jáne ony emdeýge baǵyttalǵan», -deıdi DDU tamaqtaný jáne azyq-túlik qaýipsizdigi máseleleri jónindegi departament dırektory Franchesko Branka.
DDU durys tamaqtaný, anemııany dál jáne ýaqtyly anyqtaý, vıtamınder men mıkroelementterdi qabyldaý jáne halyqtyń osy másele týraly habardarlyǵyn arttyrý sııaqty faktorlardyń rólin atap ótti.
DDU jańa baǵdarlamasy aıasynda anemııanyń sebepteri men qaýip faktorlaryn joıý úshin keshendi sharalar qabyldaýdy usynady.