DDSU: Vaktsına ádil bólinse, medıtsına qyzmetkerleri men qarttarǵa túgel jeter edi
Bul týraly Dúnıejúzilik densaýlyq saqtaý assambleıasynyń ashylýynda Dúnıejúzilik densaýlyq saqtaý uıymynyń bas dırektory doktor Tedros Gebreıesýs málimdedi, dep habarlaıdy QazAqparat BUU jańalyqtar ortalyǵyna silteme jasap.
Ol vırýstyń taralýyn ár elde baqylaýǵa alǵanǵa deıin pandemııa aıaqtalmaıtynyn atap ótti. Qazir eshbir el turǵyndaryn vaktsınalaý deńgeıi qanshalyqty joǵary bolsa da ózin koronavırýsty jeńdi dep sanaı almaıdy.
«Qazirgi vaktsınatsııa salasyndaǵy daǵdarys – bul pandemııany uzartatyn teńsizdiktiń aıqyn kórinisi. Tek 10 elde barlyq ekpeniń 75 paıyzdan astamy jasaldy», - dedi doktor Tedros.
«Bul ıdeıany eshqandaı dıplomatııalyq formada ustaý múmkin emes, vaktsınalardyń kóp bóligin óndiretin jáne satyp alatyn elderdiń shaǵyn toby álemniń qalǵan bóligindegi jaǵdaıdy baqylaıdy», – dep sózin tolyqtyrdy ol.
DDSU basshysynyń aıtýynsha, osy kúnge deıin jasalǵan ekpelerdiń dozalary neǵurlym ádil bólingen jaǵdaıda álemdegi barlyq medıtsına qyzmetkerleri men egde jastaǵy adamdarǵa jetkilikti bolar edi.
Doktor Tedros búgingi tańda COVAX bastamasy aıasynda 125 elge 72 mıllıon vaktsına dozasyn jetkizýge bolatynyn eske saldy.
«Bul olardyń halqynyń bir paıyzyn vaktsınalaýǵa áreń jetedi», - dedi ol.
DDSU basshysy damyǵan elderdi preparattardy kedeı memlekettermen, sonyń ishinde COVAX arqyly bólisýge shaqyrdy.
Ol Dúnıejúzilik densaýlyq saqtaý uıymynyń halyqaralyq qoǵamdastyqtyń aldyna qoıǵan maqsattary týraly aıtty. Bıylǵy jyldyń qyrkúıegine qaraı ár el halqynyń keminde 10 paıyzyn jáne jyldyń sońyna qaraı 30 paıyzyn vaktsınalaý.
«Bul ólim jaǵdaılary men aýrýdyń aýyr túriniń aldyn alady, medıtsına qyzmetkerlerin qorǵaıdy jáne ekonomıka men qoǵamdyq ómirdi qaıta bastaıdy», – dedi doktor Tedros.