DDSU tirkegen vaktsınalardy satyp alý jedeldetiledi – Áset Erǵalıev

NUR-SULTAN. QazAqparat – Dúnıejúzilik densaýlyq saqtaý uıymy tirkegen vaktsınalardy satyp alý jedeldetiledi. Bul týraly Úkimet otyrysynda QR Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

Mınıstrdiń aıtýynsha, Prezıdent Joldaýyn iske asyrý jalpyulttyq josparynyń ekinshi baǵytynda 8 is-sharany iske asyrý kózdelgen. Atap aıtqanda, Dúnıejúzilik densaýlyq saqtaý uıymy tirkegen vaktsınalardy satyp alý jedeldetiledi. Medıtsınalyq buıymdarǵa zerthanalyq jáne tehnıkalyq synaqtar júrgizý ortalyǵyn qurý kózdeledi.

«Deni saý ult» ulttyq jobasy aıasyna keminde 12 sanıtarııalyq-epıdemıologııalyq saraptama zerthanasy joǵary tehnologııalyq jabdyqpen qamtamasyz etiledi. Otandyq taýar óndirýshilermen offteık-kelisimsharttardyń kólemi men nomenklatýrasy keńeıtiletin bolady», - dedi Áset Erǵalıev.