DDSU saıahatqa shyǵýdan bas tarta turýǵa keńes berdi

JENEVA. QazAqparat – Eýropada COVID-19 vırýsyn juqtyrýdyń jańa oqıǵalarynyń sany qysqardy, alaıda keı jerlerde vırýstyń taralý deńgeıi áli de óte joǵary bolyp otyr. Vaktsınalaý óte baıaý júrip jatyr. Dúnıejúzilik densaýlyq saqtaý uıymy kóptegen elderde karantın shekteýleriniń alyp tastalýy men shekaralardyń ashylýyna baılanysty vırýstyń taralýy múmkindigin eskertip otyr. Sondyqtan sarapshylar adamdardy saıahatqa shyǵýdan bas tartyp, qyraǵylyq tanytyp, belgili saqtyq sharalaryn saqtaýǵa shaqyrady. Bul týraly QazAqparat BUU Jańalyqtar ortalyǵyna silteme jasap habarlaıdy.

Eýropada koronavırýs juqtyrý oqıǵalarynyń apta saıynǵy sany sáýir aıynyń ortasynan bastap 60 paıyzǵa – 1,7 mln-nan 685 myńǵa deıin qysqarǵan. Ásirese egde jastaǵy adamdar arasynda vırýs juqtyrý jáne odan qaıtys bolý oqıǵalarynyń sany aıtarlyqtaı qysqardy. Búginde 80 jastan asqandar aýrý juqtyrý sany jaǵynan tizimniń sońynda tur. 80 jastan asqan adamdardyń 75 paıyzyna vaktsına egildi. Alaıda DDSU-da mundaı jaǵdaı buǵan deıin bolǵanyn eske salady. «Biz COVID-19 taralý deńgeıiniń tómendeýin baqylaǵan edik, biraq onyń sońynan densaýlyq saqtaý júıesi men ekonomıkaǵa keri áser etken koronavırýstyń jańa tolqyny bastalyp ketti. Buǵan deıin jibergen qatelikterimizdi qaıtalamaıyq», - dep úndedi DDSU-nyń aımaqtyq dırektory Hans Klıýge. Ol óz sózinde Eýropalyq aımaqta COVID-19 vırýsynyń 1,2 mln adamnyń ómirin qıyp áketkenin atap ótti.

Vaktsınalar COVID-19 vırýsynyń barlyq nusqalaryna qarsy áser etedi. Budan bólek, alǵash ret Úndistanda anyqtalǵan B.1.617 nusqasy anyqtaldy.

Bul rette kóptegen elder karantın shekteýlerin birtindep alyp tastap, jazǵy aılarda jappaı is-sharalardy josparlap otyr. Adamdar jıi aralasyp, saıahatqa shyǵyp otyrady, bul vırýstyń taralý qaýpin týdyrady. Sondyqtan vaktsına egilgen bolsa da, epıdemıologııalyq sharalardy eki eselendirý – test ótkizip, sekvendeý, oqshaýlaý, baılanysta bolǵandardy anyqtap, olardy karantınge otyrǵyzý mańyzdy.

«Nóldik qaýip degen túsinik joq», - dep atap ótti Hans Klıýge. Vaktsına da, testileý de saqtyq sharalarynyń ornyn toltyra almaıdy, sondyqtan maska taǵý, araqashyqtyqty saqtaý, qol jýý, bólmelerdi jeldetip, adam kóp júretin jerlerge barmaý qajet. Aıta ketsek, Eýropada vaktsınalaý óte bıaý júrip jatyr: vaktsınanyń bir dozasyn aımaq turǵyndarynyń tek 23 paıyzy alǵan, al tolyq ekpe alǵandar sany tek 11 paıyz ǵana.

DDSU maquldaǵan vaktsınalardyń COVID-19 vırýsynyń barlyq nusqalarynan qorǵaıtyny jaqsy jańalyq, alaıda eýropalyqtardyń basym bóligi áli de ekpe saldyrtqan joq.

Vaktsınalaýdyń tómen qarqyny men qazirgi jaǵdaıdy esepke ala otyryp, DDSU belsendi saıahattaýǵa keńes etpeıdi.