DDSU maımyl sheshegimen kúresý úshin 135 mln dollarlyq jahandyq jospardy iske qosty

<p>ASTANA. KAZINFORM &ndash; Dúnıejúzilik densaýlyq saqtaý uıymy (DDSU) maımyl shesheginiń (mpox) adamnan adamǵa juǵýymen kúresý úshin jahandyq naýqandy bastady, dep habarlaıdy <a href="https://russian.news.cn/20240827/efd3281f9fd241a8a3afcc69eaf07b0e/c.html" target="_blank" rel="noopener">Sınhýa</a> aqparat agenttigi.&nbsp;</p>

Strategııalyq jospar 2024 jyldyń qyrkúıeginen 2025 jyldyń aqpanyna deıin jumys isteıdi jáne 135 mln dollar qarjylandyrýdy qajet etedi.

Jahandyq, aımaqtyq jáne ulttyq kúsh-jigerdi úılestirip otyrǵan baǵdarlama qadaǵalaý jáne áreket etý strategııalaryn jaqsartýǵa, dıagnostıka men vaktsınalarǵa teń qoljetimdilikti qamtamasyz etýge, janýarlardan adamǵa juǵýyn azaıtýǵa jáne indetpen kúresý úshin qaýymdastyqtardyń múmkindikterin keńeıtýge baǵyttalǵan.

Vaktsınatsııa jospary juqtyrý tizbegin buzý úshin patsıentter men medıtsına qyzmetkerleri sııaqty qaýip eń kóp tónip otyrǵan adamdarǵa baǵyttalǵan. Onyń negizgi baǵyty – strategııalyq nusqaýlar men usynystardy berýge, sondaı-aq zardap shekken aımaqtardaǵy halyqtyń osal toptaryna medıtsınalyq kómekke qoljetimdilikti qamtamasyz etý.

«Kongo Demokratııalyq Respýblıkasynda jáne kórshiles elderdegi sheshek indetin baqylaýǵa jáne toqtatýǵa bolady», - dedi DDSU bas dırektory Tedros Adhanom Gebreıesýs.

Uıym málimdemesine sáıkes, jaqyn arada qarajat jınaýǵa úndeý jarııalanady.

Eske sala ketsek, buǵan deıin Afrıkada keń taralǵan, ásirese Kongo Respýblıkasynda áserin kúsheıtken maımyl sheshek vırýsyna (M-pox) baılanysty jahandyq tótenshe jaǵdaı jarııalanǵanyn jazǵan bolatynbyz. 

QR Densaýlyq saqtaý mınıstrligi álemdegi maımyl shesheginiń aǵymdaǵy jaǵdaıy týraly jáne elimizdiń aýmaǵynda ınfektsııanyń taralýyn boldyrmaý boıynsha qabyldanǵan sharalar týraly málimet jarııalady. 

Shvetsııa úkimeti elde maımyl sheshegi (M-pox) aýrýy tirkelgenin habarlady. 

Qytaı bıligi elde maımyl sheshegi aýrýynyń taralýyna jol bermeý úshin baqylaý-ótkizý beketterinde sanıtarlyq-epıdemıologııalyq baqylaý sharalaryn kúsheıtti.