DDSU koronavırýs naýqastaryna taǵy 3 preparatty synaqtan ótkizedi

JENEVA. QazAqparat – Dúnıejúzilik densaýlyq saqtaý uıymynyń Solidarity klınıkalyq zertteýi koronavırýsqa qarsy taǵy úsh preparatty synaqtan ótkize bastaıdy. Solidarity PLUS preparattardy zertteýdi 52 elde júrgizedi. Bul týraly QazAqparat DDSU saıtyna silteme jasap habarlaıdy.

Dúnıejúzilik densaýlyq saqtaý uıymy ózi uıymdastyrǵan Solidarity zertteýleriniń kelesi kezeńi bastalǵanyn málimdedi. Ol Solidarity PLUS dep ataldy. Onyń barysynda COVID-19-ǵa qarsy taǵy 3 preparattyń tıimdiligi statsıonarlyq jaǵdaıda aýrýhanaǵa túsken naýqastardyń qatysýymen synalady.

Bul preparattar – artesýnat, ımatınıb jáne ınflıksımab. Olardy táýelsiz sarapshylar komıssııasy koronavırýspen aýrýhanaǵa túsken naýqastar arasynda ólim sanyn azaıtady degen senimmen tańdap alǵan. Olar qazirgi kezde basqa aýrýlardy emdeýde paıdalanylady. Mysaly, artesýnat bezgektiń aýyr túrin emdeýde qoldanylsa, ımatınıb qaterli isiktiń keıbir túrlerin emdeıdi, al ınflıksımab Kron aýrýy sııaqty ımmýndyq júıe syrqattarynda jáne revmatoıdti artrıtte qoldanylady.

Solidarity PLUS zertteýlerine 52 eldiń 600 statsıonarlyq medıtsınalyq mekemesinen myńdaǵan zertteýshi qatysýda.

Budan buryn zertteýler aıasynda tórt preparattyń tıimdiligi baǵalanǵan bolatyn. Zertteýlerdiń qorytyndysy boıynsha, remdesıvır, gıdroksıhlorohın, lopınavır jáne ınterferon preparattarynyń COVID-19-ben aýrýhanaǵa túsken naýqastardyń ólimine áseri joq nemese áseri bolmashy degen túıin jasalǵan.