DDSU Eýropalyq óńirlik bıýrosynyń dırektory Qazaqstandaǵy medıtsına nysandaryn aralady

NUR-SULTAN. QazAqparat - Dúnıejúzilik densaýlyq uıymy (DDU) Eýropalyq óńirlik bıýrosynyń dırektory doktor Hans Klıýge Densaýlyq saqtaý vıtse-mınıstri Oljas Ábishevpen birge Nur-Sultandaǵy №9 qalalyq emhanaǵa bardy, dep habarlaıdy QazAqparat.

Bul týraly QR Densaýlyq saqtaý mınıstrliginiń Facebook paraqshasynan málim boldy, dep habarlaıdy QazAqparat.

Klıýge emhananyń medıtsınalyq-sanıtarlyq alǵashqy kómek kórsetý (MSAK) aıasyndaǵy qyzmetimen tanysty. Emhana dırektory Sáýle Smaǵulova alǵashqy medıtsınalyq-áleýmettik kómektiń modelin jáne qalpyna keltirý emi men ońaltý bólimshesiniń ashylǵanyn aıtty. Emhananyń basty mindeti - tegin medıtsınalyq kómektiń kepildik berilgen kólemi men mindetti áleýmettik medıtsınalyq saqtandyrý aıasynda tirkelgen halyqqa sapaly medıtsınalyq kómek kórsetý.

Patsıentterge yńǵaıly bolý úshin emhana zalynda aqparat buryshy ornatylǵan, onda dárigerlerdiń qabyldaý kestesi, emhanaǵa tirkelý týraly, saqtandyrý mártebesi jaıly bilýge, sondaı-aq emhananyń jumysyna qatysty pikir qaldyrýǵa bolady.

Medıtsınalyq-áleýmettik terezeniń qyzmetkerleri ómirlik qıyn jaǵdaıǵa tap bolǵan patsıentterge konsýltatsııalyq kómek kórsetedi. Patsıenttermen turaqty baılanys ornatylǵan. Emhanaǵa kópbalaly otbasylar, múgedek balalar kelgen kezde áleýmettik qyzmetkerler olardy dárigerdiń qabyldaýyna, zerthanalyq jáne dıagnostıkalyq tekserýden ótýge alyp keledi.

Hans Klıýge halyq arasynda vaktsınatsııalaý qalaı júrip jatqanyn surady. Sáýle Smaǵulova profılaktıkalyq egýler Ulttyq egý kúntizbesine jáne aldyńǵy egý anamnezine sáıkes júrgiziletinin atap ótti. Ortasha alǵanda emhanada kúnine 30-35 vaktsınatsııa salynady.

Sondaı-aq, DDSU ókilderi emhanadaǵy Densaýlyq saqtaý mınıstrliginiń jobalyq ofısine bardy.
Jobalyq ofıstiń basty maqsaty - QR Premer-Mınıstriniń ókimimen bekitilgen MSAK damytý jónindegi is-sharalar josparyn iske asyrý. MSAK dárigerine júktemeni tómendetý, aýyldyq jerlerdegi kadr tapshylyǵyn joıý jáne t.b. mindetter qoıyldy.

Kezdesý qorytyndysy boıynsha Hans Klıýge emhanada Áleýmettik jáne medıtsınalyq sıpattaǵy qyzmetterdiń tolyq kesheni usynylatynyn atap ótti. Ol emhana qyzmetin joǵary baǵalap, 2018 jyly qabyldanǵan MSAK boıynsha Astana deklaratsııasyna sáıkes keletinin aıtty. Bul qujattyń negizgi qaǵıdaty - medıtsınalyq-sanıtarlyq alǵashqy kómekti damytý jáne qoljetimdi etý.

Hans Klıýge dárigerlermen jáne medbıkelermen júrgizilgen jumys týraly jeke áńgimelesip, balany damytý kabınetindegi medbıkeniń qolyn alyp, DDSU 2020 jyldy Medbıkeler men akýsherler jyly dep jarııalaǵanyn eske salyp, quttyqtady.

Kezdesý sońynda ol medıtsına qyzmetkerleriniń adal eńbegine alǵys aıtyp, tabys tiledi.

«Emhananyń jaqsy jabdyqtalǵany emes, medıtsınalyq qyzmetkerlerdiń adamdarǵa degen qarym-qatynasy mańyzdy», - dedi ol.