DDSU: Eger memleketter koronavırýs vaktsınasymen bólispese, biz bastalǵan jerge qaıta oralamyz
Sondaı-aq, ol ekpeniń tórtten úsh bóligi álemdik JІÓ-niń 60 paıyzy tıesili 10 elde jasalǵanyn atap ótti. Jalpy 2,5 mıllıard adam turatyn basqa 130 elde birde-bir adamǵa ekpe jasalmady.
«Keı elderde qaýip tobyna jatpaıtyn adamdardyń da biraz bóligine vaktsına salyndy. Kez kelgen úkimet óz halqyn qorǵaýǵa mindetti. Biraq vaktsınasy bar elder ózderiniń medıtsına qyzmetkerleri men qarttaryna ekpe salǵannan keıin, turǵyndarynyń qalǵan bóligin qorǵaǵysy kelse – vaktsınamen bólisý kerek», - dedi dáriger Tedros.
«Álemdegi qaýip tobyndaǵy adamdarǵa ekpe egý úshin qanshalyqty kóp ýaqyt ketse – biz vırýstyń mýtatsııalanyp, vaktsınany «aldaýyna» sonshalyqty kóp múmkindik beremiz. Basqasha aıtqanda, biz vırýsty jumylyp jeńbesek, bastalǵan jerge qaıta oralamyz», - dep túsindirdi ol.
Aıta ketsek, sársenbi kúni DDSU men onyń seriktesteri COVAX bastamasy aıasynda koronavırýsqa qarsy vaktsınany bólýdiń alǵashqy aralyq boljamyn jarııalady. Kóptegen el turǵyndardy vaktsınatsııalaý kampanııasyn bastaýǵa daıyn, biraq ázirge preparattar jetkiliksiz.
Dáriger Tedros vaktsınasy bar memleketterdi basqa eldermen bólisýge shaqyrdy.
«Sondaı-aq biz vaktsına óndirýdi kóbeıtýimiz kerek. Ótken aptada Sanofi kompanııasy Pfizer/BioNTech vaktsınalaryn óndirý úshin óziniń óndiristik ınfraqurylymyn usynatynyn aıtty. Biz basqa kompanııalardyń da osydan úlgi alǵanyn qalaımyz», - dedi Tedros myrza.
Eske salsaq, Qazaqstanda 1 aqpannan bastap jappaı vaktsınalaý sharasy bastaldy.
Vaktsınalaý týraly tolyq aqparatty QazAqparat agenttiginiń arnaıy aıdarynan oqýǵa bolady.