DDSU: COVID-19 juqtyrǵan nemese odan qaıtys bolǵandar sany joǵary deńgeıde qalyp otyr

JENEVA. QazAqparat – COVID-19 boıynsha álemdegi ahýal ótken aptada turaqtandy. Buǵan deıin eki aı boıy juqtyrý jaǵdaı udaıy artyp otyrdy. Alaıda aýyrǵandar men ólim sany kórsetkishi áli de joǵary. 4,5 mıllıon jańa juqtyrý jaǵdaıy men 68 myń ólim tirkeldi. Dúnıejúzilik densaýlyq saqtaý uıymynyń (DDSU) basshysy Gebreıesýs Jenevada ótken brıfıng barysynda osylaı málimdedi, dep habarlaıdy QazAqparat DDSU-nyń resmı saıtyna silteme jasap.

Brıfıng Twitter-de translıatsııalandy. Gebreıesýstiń aıtýynsha, jaǵdaı túrli óńirlerde, elderde jáne provıntsııalarda ártúrli, Keıbir óńirler men elderde burynǵysha juqtyrý jaǵdaıy men ólim sanynyń kúrt ósýi saqtalǵan, alaıda basqa elderde bul kórsetkishterdiń tómendeýi baıqalady.

Bul vırýs taralyp jatqan kezde ol jerlerge qaýip tóndiredi.

DDSU qaýipsizdik sharalaryn saqtap, koronavırýs vaktsınasyn alýǵa shaqyrady.

«DDSU koronavırýstyń paıda bolýyn anyqtaý boıynsha jumys istep jatyr» dep habarlanady.

Ótken juma kúni DDSU álemniń barlyq ǵalymdaryn Jańa patogenderdiń paıda bolýy jónindegi ǵylymı-konsýltatıvtik topqa (SAGO) ótinish berýge ashyq túrde shaqyrdy.

SAGO quramyna SARS-CoV-2-niń paıda bolýyn zertteýdiń kelesi kezeńin qosatyn jańa patogenderdi zertteý boıynsha sarapshylar kiredi. DDSU barlyq bilikti mamandardy atalmysh topqa qosylýǵa shaqyrady.

Jaqynda «Jıyrmalyq toby» pandemııaǵa daıyndyq pen jaýap berý úshin jahandyq qaýymdastyqty qarjylandyrý boıynsha joǵary deńgeıdegi táýelsiz top qurdy.

Ótken aıda top usynystar jınaqtalǵan esep jarııalady.

Olar pandemııaǵa daıyndyqty jáne oǵan jaýap berýdi tıimdi jahandyq basqarý qajettiligin moıyndaıdy.

Sonymen qatar epıdemııa men pandemııanyń aldyn alý, oǵan daıyndyq, anyqtaý jáne tez jaýap berý úshin jetildirilgen júıeler men quraldardyń qajettiligin, onymen qosa vaktsına sııaqty jahandyq daıyndyq pen jaýap berý sharalaryn qarjylandyrýdy jaqsartý kerektigin moıyndaıdy.

Ol kelesi úsh aıdyń pandemııaǵa daıyndyq pen jaýap berý sharalaryn engizý úshin mańyzdy kezeń bolatynyn málemdedi.