DDSU basshysy jańa pandemııaǵa daıyndalýǵa úndedi

JENEVA. TASS-QazAqparat – Álem elderi qazirgi koronavırýs pandemııasynan sabaq alyp, jańa indetter men pandemııaǵa daıyndalýy kerek. Bul týraly dúısenbide Dúnıejúzilik densaýlyq saqtaý uıymynyń (DDSU) bas dırektory Tedros Adan Gebreıesýs málim etti, dep habarlaıdy QazAqparat TASS agenttigine silteme jasap.

«Biz bárimiz pandemııa úıretetin sabaqtardy úırenýimiz kerek», - dedi. DDSU basshysy atap ótkendeı, «jańa epıdemııalar men pandemııalarǵa daıyndyq, olardyń aldyn alý, anyqtaý jáne olarǵa jedel áreket etý úshin densaýlyq saqtaý qyzmetterimen jappaı qamtý jáne alǵashqy medıtsınalyq kómek negizinde barlyq múmkindikti jasaý kerek», -dedi Tedros Adan Gebreıesýs Shaǵyn aral memleketteriniń densaýlyq saqtaý sammıtine qatysýshylarǵa telebaılanys arqyly sóılegen sózinde.

COVID-19 pandemııasy týraly aıta otyryp, Gebreıesýs «vaktsınalyq teńsizdik pen vaktsınalyq ultshyldyqqa» nazar aýdardy, bul «tabysy joǵary jáne tómen elder arasyndaǵy alshaqtyqty» arttyrdy. Onyń aıtýynsha, koronavırýsqa qarsy barlyq ekpeniń 77%-y qazir álemniń 10 memleketine tıesili

«Eger elder vaktsınalardy dereý COVAX mehanızmimen bólisse jáne óndirýshiler COVAX tapsyrystaryna basymdyq berse, onda biz qyrkúıekke qaraı ár elhalqynyń kem degende 10%-yn jáne jyldyń sońyna deıin kem degende 40%-yn vaktsınalaı alamyz», - dedi bas dırektor. Ol qyrkúıekke deıin «vaktsınanyń qosymsha 250 mıllıon dozasyn» izdeý kerek ekenin eske saldy.

DDSU COVAX mehanızmine úlken mán beredi. Baǵdarlama sharttaryna sáıkes, tabysy joǵary elder jan basyna shaqqandaǵy tabysy tómen memleketter úshin vaktsınalardy satyp alýǵa tólem jasaıdy. Mehanızm aıasynda 2021 jyldyń sońyna qaraı búkil álemde koronavırýsqa qarsy vaktsınalardyń 2 mıllıard dozasy óndirilip, birkelki taratylýy kerek dep josparlanýda.