DDSU basshysy Tedros Gebreıesýs Júrsin Ermandy quttyqtady: Qudalyǵymyz máńgilik bolsyn

NUR-SULTAN. QazAqparat – Dúnıejúzilik densaýlyq saqtaý uıymynyń bas dırektory Tedros Gebreıesýs belgili aqyn, aıtys janashyry Júrsin Ermandy mereıtoıymen quttyqtap, bir aýyz óleńin jatqa oqydy, dep habarlaıdy QazAqparat tilshisi.

Dúnıejúzilik densaýlyq saqtaý uıymynyń basshysy Tedros Gebreıesýs Facebook -tegi paraqshasynda erekshe jazba jarııalady. «Congratulations Zhursin Yerman Kuda! Qutty bolsyn, Júrsin Erman Quda!» dep bastalatyn jazbanyń astynda qazaqı shapan men bórik kıgen DDSU basshysynyń Júrsin Ermandy mereıtoıymen qazaq tilinde quttyqtaǵan vıdeosy salynǵan.

«Qurmetti Júrsin quda! Mereıtoıyńyz qutty bolsyn! Densaýlyǵyńyz zor bolsyn! Ómir uzaq bolsyn! Qudalyǵymyz máńgilik bolsyn!

Arbasa nápsi-ybylys,

Alańdaı berem ulyp ish.

Kóńilge nege syımaısyń

Kózime syıǵan qubylys?!», - deıdi Tedros Gebreıesýs.

Dúnıejúzilik densaýlyq uıymy basshysynyń Júrsin Ermanǵa «Qurmetti quda» dep qaıyrylýynyń sebebin bilý úshin bıyl 70-ke tolǵan aqynnyń ózine habarlastyq.

«Meniń bir jıenim Tedros Gebreıesýstiń ulyna turmysqa shyqqan. Ózim jıen qyzym deımin, kishi qyzymnyń qyzy ǵoı endi. Qazir ol jıenim Jenevada turady. Tedros Gebreıesýske meniń óleńimdi jattatqyzyp, qazaqsha úıretip júrgen sol jıen qyzym ǵoı», - dep qysqa qaıyrdy Júrsin Erman.

Aıta keteıik, Tedros Gebreıesýs Dúnıejúzilik Densaýlyq saqtaý uıymynyń bas dırektory qyzmetine 2017 jyly kirisken bolatyn. Al 2012-2016 jyldary Efıopııanyń Densaýlyq saqtaý mınıstri retinde qyzmet etken.