DDSU basshysy: Memleketter COVID-19 vırýsyn anyqtaıtyn 120 mıllıon ekspress-test alady

NUR-SULTAN. QazAqparat – Aldaǵy jarty jylda tabysy tómen jáne ortasha elder vırýsty tekseretin 120 mıllıon qoljetimdi, sapaly jáne jyldam ekspress-test alady, dep habarlaıdy QazAqparat news.un.org-ke silteme jasap.

Bul týraly búgin arnaıy brıfıng barysynda Dúnıejúzilik densaýlyq saqtaý uıymynyń Bas dırektory Tedros Adhanom Gebreıesýs málimdedi.

«COVID-19 vırýsyn neǵurlym tez anyqtasaq, qaýipti vırýsty juqtyrǵan adamdardy oqshaýlaý jáne emdeý sharalaryn soǵurlym tez qabyldaımyz», - dedi ol.

DDSU basshysynyń aıtýynsha, testileýdiń jańa ádistemesi shamamen 15-20 mınýt ishinde senimdi qorytyndy alýǵa múmkindik beredi. Bul rette jańa testtiń baǵasy arzanyraq jáne kúrdeli tehnıkalyq jabdyqtyń bolýyn qajet etpeıdi.

«Bul testileýdi medıtsınalyq zerthanalary men daıyn mamandary joq aýdandarda keńeıtýge jol ashady», - dep atap ótti Tedros Adhanom Gebreıesýs.

Qazirgi kezde bir ekspress-testtiń baǵasy shamamen bes AQSh dollaryn quraıdy. Bul buǵan deıin shyǵarylǵan testilerden áldeqaıda arzan. DDSU aldaǵy ýaqytta baǵa odan áli de tómendeıdi degen boljam jasap otyr.

DDSU basshysy 120 mıllıon testini jetkizý týraly kelisimge óndirýshi kompanııalar men Bıll jáne Melında Geıts qory qol qoıǵanyn málimdedi.

«Resmı túrde rastalǵan kelisim bar, joba qarjylandyrý bastaldy, endi bul testilerdi tolyq kólemde satyp alýǵa qajetti somany jınaý kerek», - dedi ol.