DDSU basshysy koronavırýs juqtyrǵan adammen baılanysta bolǵan soń ózin oqshaýlady

JENEVA. QazAqparat – Dúnıejúzilik densaýlyq saqtaý uıymynyń bas dırektory Tedros Adanom Gebreıesýsqa koronavırýs ınfektsııasyn juqtyryp alǵan adammen baılanysta bolǵan soń óz-ózin oqshaýlaýǵa týra keldi. Bul týraly ol Twitter paraqshasynda málim etti, dep habarlaıdy QazAqparat.

«Meniń COVID-19 vırýsyna shaldyqqan adammen baılanysta bolǵanym anyqtaldy. Ózimdi jaqsy sezinip júrmin, aýrýdyń belgileri joq, biraq DDSU hattamasyna sáıkes aldaǵy kúnderi óz-ózimdi oqshaýlap, úıden jumys isteımin» dep jazdy DDSU basshysy áleýmettik jelide.

«Bizdiń densaýlyq saqtaý boıynsha barlyq keńesti saqtaýymyz óte mańyzdy. COVID-19 vırýsynyń taralý tizbegin osylaısha úzip, densaýlyq saqtaý júıesin dál osylaı qorǵap qala alamyz», - dep atap ótti Tedros Adanom Gebreıesýs.

«Uıymdaǵy áriptesterim jáne men adam ómirin qorǵap, saqtap qalý úshin yntymaqtastyq belgisi retinde, seriktes retinde ary qaraı aralasamyz» dep qosyp ótti ol.

DDSU málimetinshe, pandemııa bastalǵaly álemde 46 mıllıonnan astam adam koronavırýs juqtyrǵan. Qaýipti vırýs ǵalamshardaǵy 1,1 mıllıonnan astam adamnyń ómirin qıyp áketti.