DDSU basshysy COVID-19 pandemııasynyń 2023 jyly aıaqtalatynyna senim bildirdi

JENEVA. QazAqparat - Dúnıejúzilik densaýlyq saqtaý uıymynyń (DDSU) bas dırektory Tedros Adanom Gebreıesýs COVID-19 pandemııasynyń 2023 jyly aıaqtalatynyna jáne osy aýrýǵa baılanysty halyqaralyq tótenshe jaǵdaı rejıminiń joıylatynyna senimdi. Bul týraly ol densaýlyq saqtaý salasyna qosqan úlesi úshin kishi Tomas Frensıs medalimen marapattalǵan kezde aıtty, dep habarlaıdy QazAqparat TASS-qa silteme jasap.

«Bıyl biz COVID-19-dyń qoǵamdyq densaýlyq saqtaý salasyndaǵy tótenshe jaǵdaı jáne pandemııa retinde aıaqtalady dep aıta alatynymyzǵa senimdimin», - dedi Gebreıesýs.

Ol 11 naýryzda «DDSU alǵash ret COVID-19 jahandyq órshýin pandemııa retinde sıpattaýǵa bolatynyn jarııalaǵanyna» úsh jyl tolatynyn eske saldy. Bul álemdik aqparat quraldarynyń nazaryn aýdarǵan mańyzdy sát boldy.

«Qazir biz pandemııa kezine qaraǵanda áldeqaıda jaqsy jaǵdaıdamyz», - dedi bas dırektor. Ol DDSU úsh jyl buryn SARS-CoV-2 taralýyna qatysty «pandemııa» sózin alǵash ret qoldanǵan kezden góri «alǵash ret apta saıynǵy habarlanǵan ólim sanynyń az bolǵanyna» nazar aýdardy. «Jaǵdaı aıtarlyqtaı jaqsardy», - dep qosty Gebreıesýs.

Pandemııadan úırenýge bolatyn «sabaqtardyń» ishinde ol densaýlyq saqtaý, ǵylymı zertteý júrgizý, halyqaralyq yntymaqtastyqqa ınvestıtsııa salýdyń mańyzdylyǵyn atady.