DDSU basshysy: COVID-19 pandemııasy taıaýda aıaqtalmaıdy

JENEVA. QazAqparat – Álemde COVID-19 vırýsyn juqtyrý jáne ólim sany sońǵy eki aıda alǵash ret taǵy artyp, pandemııanyń aıaqtalýdan alys ekenin kórsetip otyr. Bul týraly Jenevada ótken brıfıng kezinde Dúnıejúzilik densaýlyq saqtaý uıymynyń basshysy Tedros Adanom Gebreıesýs málim etti, dep habarlaıdy QazAqparat Euronews-ke silteme jasap.

Uıym basshysynyń aıtýynsha, pandemııanyń beti qaıtpaýyna negizinen onymen kúres quraldaryna qoljetimdilik árkelki bolǵany sebepshi bolyp otyr. Bul muqtajdyq úshin DDSU-ǵa 23 mlrd dollardan astam qarajat qajet.

«Búginde biz COVID-19 vırýsymen kúres júrgizýdi josparlaý úshin jańa bıýdjetti jarııalap otyrmyz. Elderge vırýspen kúres júrgizý jolynda úlken maqsattarǵa qol jetkizip, qajetti quraldar usyný úshin aldaǵy 12 aıda 23,4 mıllıard dollar qarajat kerek. Bul bastamany tolyq qarjylandyrý – DDSU strategııasynyń, daıarlyq jáne eleý josparynyń, pandemııany baqylaýǵa alý boıynsha bárin qamtıtyn josparymyzdyń mańyzdy bóligi», - dep atap ótti T.Gebreıesýs.