DDSU basshysy: Álem halqynyń 70% -yn vaktsınalaǵan kezde ǵana pandemııany jeńýge bolady

LONDON. QazAqparat – Álem halqynyń keminde 70 paıyzyn vaktsınalaǵan kezde ǵana COVID-19 pandemııasyn jeńýge bolady. Mundaı málimdemeni Dúnıejúzilik densaýlyq saqtaý uıymynyń (DDSU) bas dırektory Tedros Gebreıesýs G7 sammıtinde jasady, dep habarlaıdy QazAqparat BUU Jańalyqtar ortalyǵyna silteme jasap.

«Pandemııany tolyǵymen jeńý úshin biz álem halqynyń kem degende 70 paıyzyna vaktsına egýimiz kerek jáne muny kelesi jyly Germanııada bolatyn kezekti kezdesýge deıin jasaý qajet. Muny «úlken jetilik» pen «úlken jıyrmalyqtyń» birlesken qoldaýymen iske asyrýǵa bolady. Ol úshin bizge 11 mıllıard doza vaktsına kerek»,– dep málimdedi DDSU basshysy.

«Qysqa merzimdi perspektıvaǵa keletin bolsaq, ol osy jyldyń qyrkúıek aıyna qaraı ár eldiń turǵyndarynyń kem degende 10 paıyzyn, al jyl sońyna deıin 40 paıyzyn vaktsınalaý kerek»,- dep málimdedi ol. «Bul úshin dál qazir, ıaǵnı osy jáne kelesi aıda 100 mıllıon doza vaktsına, al qyrkúıek qaraı taǵy 250 mıllıon vaktsına qajet. Olar COVAX bastamasy arqyly taratylýy kerek».

Tedrostyń aıtýynsha, tehnologııalardy kedeı elderge berý jáne zııatkerlik menshik quqyǵynan bas tartý esebinen olardyń óndirisin keńeıtý qajet.

DDSU basshysy álemdi aldaǵy pandemııadan qorǵaý úshin qazirgi daǵdarystan sabaq alýǵa shaqyrdy. Qazir eń bastysy –yntymaqtastyqqa qol jetkizý jáne ár elge óz halqynyń qaýipsizdigin qamtamasyz etý úshin qajetti málimetter, aqparattar, resýrstar, tehnologııalarmen jáne barlyq quraldarmen almasýdy jolǵa qoıý kerek.

Sondaı-aq ol pandemııaǵa daıyndyqty arttyrý jáne jańa patogenderdiń shyǵý kózderin anyqtaýda yntymaqtastyqty nyǵaıtý týraly «halyqaralyq kelisimshart, konventsııa» jasasýdy usyndy.