DDSU: «AstraZeneca»-men vaktsınalaýdy toqtatqan elder tizimi artty

NUR-SULTAN. QazAqparat – Dúısenbide Eýropanyń taǵy birneshe eli AstraZeneca vaktsınasyn qoldanýdy ýaqytsha toqtatty. Yqtımal asqynýlarǵa baılanysty bul preparatpen ázirge halyqty vaktsınalamaý sheshimin qabyldaǵan memleketterdiń tizimin Frantsııa, Germanııa jáne Italııa tolyqtyrdy, dep habarlaıdy QazAqparat BUU jańalyqtaryna silteme jasap.

DDSU basshysy doktor Tedros Gebreıesýs atap ótkendeı, onyń uıymy jaǵdaıdy muqııat qadaǵalap otyr jáne tergeý júrgizilýde.

Esterińizge sala keteıik, AstraZeneca vaktsınasyn alǵan eýropalyqtar arasynda azdaǵan tromboz jaǵdaılary oryn alǵany anyqtaldy. Másele Eýropada óndirilgen osy preparattyń eki partııasy jóninde bolyp otyr. Osydan keıin Eýropanyń birqatar eliniń bıligi tergeý nátıjeleri belgili bolǵanǵa deıin osy vaktsınany qoldanýdy toqtata turý týraly sheshim qabyldady.

DDSU sarapshylary tromboz jaǵdaılary men AstraZeneca vaktsınasy arasyndaǵy baılanys áli rastalmaǵanyn aıtady. Sonymen qatar, sarapshylardyń aıtýynsha, álemde júzdegen mıllıon vaktsına jasaldy jáne ázirge odan birde-bir ólim resmı túrde tirkelgen joq.

Kóptegen elderde vaktsınalaý áli bastalmady

«Kún saıyn maǵan álemniń saıası jetekshileri qońyraý soǵady. Óz elderi COVAX aıasynda vaktsınalardy qashan alatynyn suraıdy», – deıdi DDSU basshysy.

«Olardyń keıbiri alańdaýly, men onyń sebebin túsinemin. Olar álemdegi eń baı elderdiń vaktsınalardy kóp mólsherde satyp alyp jatqanyn kórip otyr. Mundaı kólemdegi vaktsınamen kedeı elderdiń turǵyndaryn birneshe ret vaktsınalaýǵa bolady. Alaıda, bul elderde birde-bireýi joq», – dep qosty ol.

DDSU basshysy sonymen birge COVID-19-ben kúreste Yntymaqtastyq qory qurylǵannan beri bir jyl ótkenin eske saldy. Osy kezeńde qor 242 mıllıard dollar jınady. DDSU tarıhynda alǵash ret qaıyrymdylyq jeke tulǵalardan da kelip tústi. Ondaǵan elderge jeke qorǵanys quraldary, koronavırýsqa testiler men medıtsınalyq jabdyqtar jetkizildi.

Eske salaıy, buǵan deıin Oksford ýnıversıteti men AstraZeneca kompanııasy óndirgen vaktsınany qoldanýdy Irlandııa, Bolgarııa, Danııa, Islandııa, Norvegııa jáne Taıland ýaqytsha toqtatqan bolatyn.

Al Dúnıejúzilik densaýlyq saqtaý uıymy AstraZeneca vaktsınasy men qan uıyǵyshtyq arasynda eshqandaı dálel joq ekenin málimdep, pandemııamen kúreste vaktsınany qoldanýdy jalǵastyrýǵa shaqyrdy.