DDSU: Ana balasyn koronavırýs juqtyrǵannan keıin de, vaktsına saldyrtqannan keıin de emize alady

NUR-SULTAN. QazAqparat – Dúnıejúzilik densaýlyq saqtaý uıymynyń sarapshylary áıel COVID-19 juqtyrǵannan keıin de, koronavırýsqa qarsy vaktsına saldyrtqannan keıin de balasyn emizýin jalǵastyra alatynyna sendirip otyr. Sebebi, ana sútinde vırýs tabylmaǵan. Bul týraly QazAqparat BUU Jańalyqtar saıtyna silteme jasap habarlaıdy.

Budan bólek, uıym mamandary ana sútiniń quramynda ımmýndaýdan keıin kerisinshe, balanyń vırýsqa shaldyǵýynan qorǵaı alatyn antıdeneler anyqtalǵanyn atap ótken.

DDSU bala emizetin analardy ekpe saldyrtyp, bala emizýin jalǵastyra berýge úndep otyr.

«Barlyq úsh balamdy emizgen áıel retinde ana súti, tipti COVID-19 vırýsyn juqtyrǵan analar súti – náresteler úshin eń jaqsy qorek kózi ekenin aıta alamyn. Eger ınfektsııaǵa shaldyqqan áıel tıisti saqtyq sharalaryn qoldansa, ol balasyn emizýin jalǵastyra bere alady», - deıdi DDSU Eýropalyq aımaqtyq bıýrosynyń Eldik strategııalar jáne densaýlyq saqtaý júıeleri bóliminiń dırektory Natasha Atstsopardı-Mýskat.

Uıym sarapshylary COVID-19 juqtyrǵan analarǵa bala emizý kezinde maska taǵyp, balany qolǵa almas buryn qoldy jaqsylap sabyndap jýýǵa, sondaı-aq jan-jaqty turaqty túrde dezınfetsııalaýǵa keńes beredi.

DDSU-nyń ishine postkeńestik elder kirip otyrǵan Eýropalyq aýmaǵynda bala emizý kórsetkishi – álemde eń tómen. Eýropada nárestelerdiń nebári 13 paıyzy ǵana alǵashqy alty aıynda tek ana sútimen qorektenedi. Budan basqa, aımaqta vaktsınalaýdyń tolyq kýrsyn eresek turǵyndardyń tek úshten bir bóligi ǵana ótken.