DDS Assambleıasy QR Densaýlyq saqtaý mınıstrligi daıyndaǵan qujatty maquldady
2020 jylǵy 12 qarashada Dúnıejúzilik Densaýlyq saqtaý Assambleıasy – DDSU-nyń joǵary basqarýshy organy – 2018 jylǵy MSAK (Alǵashqy medıtsınalyq-sanıtarlyq kómek) jónindegi Astana deklaratsııasynyń erejelerin iske asyrýǵa arnalǵan «alǵashqy medıtsınalyq-sanıtarııalyq kómek kórsetý qaǵıdalaryn» maquldady.
Dúnıejúzilik densaýlyq saqtaý assambleıasynyń 73-sessııasynda «Alǵashqy medıtsınalyq-sanıtarlyq kómektiń jumys isteý mehanızmi» qujaty qabyldandy, ony 194 memleket qoldady. Ol DDSU-nyń MSAK jónindegi Eýropalyq bıýrosynyń shtab-páterinde qazaqstandyq taraptyń qatysýymen birlese ázirlengen. DDSU ókilderi atap ótkendeı, Qazaqstan kezekti ret alǵashqy medıtsınalyq-sanıtarlyq kómek kórsetýdi ońtaılandyrý baǵytynda álem elderi aldynda kósh bastady.
Alǵashqy medıtsınalyq-sanıtarlyq kómektiń túpki maqsaty – azamattardyń densaýlyǵyn jaqsartý jáne densaýlyq saqtaý júıesin nyǵaıtý. Qazir koronavırýs pandemııasy álemdi sharpyǵan kezde bul óte mańyzdy. DDSU Qazaqstanmen birge osy maqsatqa jetýdiń bes tetigin anyqtady. Ol:
- densaýlyq saqtaý salasyndaǵy oqshaýlaý men áleýmettik teńsizdikti azaıtý (jalpyǵa birdeı qamtýǵa qol jetkizý reformalary);
- adamdardyń qajettilikterine baǵdarlanǵan densaýlyq saqtaý qyzmetterin uıymdastyrý (qyzmetterdi jetkizý salasyndaǵy reformalar);
- Densaýlyq aspektilerin barlyq sektorlarǵa biriktirý (qoǵamdyq saıasat reformalary);
- yntymaqtastyq modelderine sáıkes saıası dıalog júrgizý (kóshbasshylyq qyzmettegi reformalar);
- múddeli taraptardyń qatysýyn keńeıtý.
Mınıstrlik taratqan aqparatqa qaraǵanda, 2018 jyldan bastap MSAK týraly Astana deklaratsııasy álem elderiniń osydan qyryq jyl buryn qabyldanǵan MSAK jónindegi tarıhı Almaty deklaratsııasynyń prıntsıpterin basshylyqqa alyp kelgenin taǵy bir dáleldedi. Sonymen birge, elderdiń qazirgi problemalardy sheshýdegi birlesken kúsh-jigerin úılestirýde jáne ulttyq densaýlyq saqtaý júıesin nyǵaıtý boıynsha alǵashqy medıtsınalyq-sanıtarlyq kómek operatsııalarynyń negizderi sııaqty tehnıkalyq nusqaýlyqtardy ázirleýde DDSU jahandyq saıasatty jiti baqylap keledi.
QR Densaýlyq saqtaý birinshi vıtse-mınıstri Marat Shoranov óz baıandamasynda DDSU-ǵa múshe memleketterdi aǵymdaǵy jyldyń qarasha aıynyń sońynda alǵashqy medıtsınalyq-sanıtarlyq kómek kórsetýdiń jedel mehanızmin iske asyrýǵa arnalǵan is-sharaǵa qatysýǵa shaqyrdy. Sharaǵa qatysý densaýlyq saqtaý júıesin nyǵaıtý quraldaryn engizýge kómektesedi. Sondaı-aq, ol memleketter arasynda MSAK boıynsha kúsh-jigerdi biriktirý jáne odan ári nyǵaıtý úshin arnaıy qurylǵan topqa qosylýǵa usynys bildirdi.
Elderdiń 2030 jylǵa deıingi turaqty damý maqsattarynda aıtylǵan «densaýlyqty saqtaýdy qamtamasyz etý, eshkimdi nazardan tys qaldyrmaý» prıntsıpi koronavırýs pandemııasy kezinde erekshe ózekti bolyp tabylady.
Dál osy MSAK densaýlyq saqtaý júıesindegi basty protsess bolyp tabylady. Ol óziniń qoljetimdiligi men úzdiksiz, joǵary sapaly medıtsınalyq kómek kórsetýmen, patsıent pen medıtsınalyq qyzmetker arasyndaǵy alǵashqy baılanys oryndarynda kórsetilýimen jáne barlyq jastaǵy naýqastardyń qajettiligine baǵyttalýymen mańyzdy.
Dúnıejúzilik densaýlyq saqtaý assambleıasynyń COVID-19 pandemııasyna baılanysty alǵash ret vırtýaldy formatta shaqyrylǵan 73-shi sessııasy 2020 jyldyń 18-19 mamyrynda qysqartylǵan rejımde ótti. Onyń jumysy 2010 jyldyń 9 qarashasynda bastalyp, 14 qarashada aıaqtalady.