DAZN platformasy Gennadıı Golovkınniń arqasynda qansha paıda tapty

NUR-SULTAN. QazAqparat - Fightnights.com saıtynyń tvıtterinde DAZN strımıng platformasynyń meksıkalyq boksshy Saýl Alvarespen jáne qazaqstandyq Gennadıı Golovkınmen kelisimshartqa otyrǵannan keıingi tabysy týraly málimet jarııalandy, dep habarlaıdy QazAqparat Sports.kz silteme jasap.

Basylymnyń jazýynsha, «Kanelo» men Golovkın DAZN platformasyna qomaqty tabys ákelip otyr.

«DAZN jylyna 200 mln dollar taýyp otyrǵanyn senimmen aıtýǵa bolady. Osy somanyń teń jartysy «Kanelo» men Gennadıı Golovkınniń arqasynda keledi. Olar jylyna eki ret aıqas ótkizý arqyly osynsha paıda ákelýde. Bálkim, DAZN áli baıyp kete qoıǵan joq shyǵar, biraq ol baılyqqa aparatyn jolda», - dep jazdy FightNights.com.

DAZN strımıng platformasy «Kanelo» men Golovkındi óz qataryna qosý úshin jumsaǵan soma mynadaı: Alvareske 11 jekpe-jek úshin - 365 mln dollar, al Golovkınge 6 aıqas úshin - 100 mln dollardan astam.

Eske sala keteıik, Gennadıı Golovkın taıaýda rıngke qaıta oralady. Ol 8 maýsym kúni Nıý-Iorkte kanadalyq boksshy Stıv Rollspen kezdesý ótkizedi.