DAZN «Kanelony» Golovkınmen úshinshi jekpe-jekti qyrkúıekte ótkizýge shaqyrdy

NUR-SULTAN. QazAqparat – DAZN strımıng servısiniń sarapshylary Krıs Mennıks pen Serhıo Mora Saýl «Kanelo» Alvarestiń kezekti jekpe-jegin talqylap, Gennadıı Golovkınmen bolatyn úshinshi aıqasqa da toqtalyp ótti, dep habarlaıdy QazAqparat Sports.kz saıtyna silteme jasap.

Buǵan deıin Alvares kelesi jekpe-jegin kúzde ótkizýge nıet etip otyrǵanyn aıtqan bolatyn. Ol mamyrdyń basynda aıqasqa shyǵýdy josparlaǵan edi, biraq koronavırýs pandemııasyna baılanysty jekpe-jek keıinge qaldy.

- «Kanelo» da qazir búkil boks álemi sekildi úziliste. Josparlanǵan jekpe-jek bolmaǵanyna qaramastan, «Kanelo» «Box Azteca» telebaǵdarlamasyna bergen suhbatynda qyrkúıek aıynda rıngke qaıta oralýǵa nıetti ekenin málimdedi. Siz «Kanelo» qyrkúıek aıynda judyryqtasýǵa daıyn bolatynyna senesiz be?

- Onyń kimmen shyǵatyny da belgisiz. Golovkın – bárine qyzyqty bolatyn qarsylas. Biraq GGG kelesi jekpe-jegin «Kanelomen» ótkizgisi kelmeýi múmkin. «Kanelo» Bıllı Djo Sonderspen aıqasqa shyqqysy keledi, bul jaǵdaıda Golovkınmen bolatyn jekpe-jek keıinge qalady. Meniń oıymsha Alvares daıyn, biraq onyń kimmen judyryqtasatynyn bilmeımin», - deıdi Mannıks.

Onyń áriptesi Mora da GGG-men úshinshi jekpe-jek jóninde sóz qozǵady:

— Sonderspen jekpe-jek jaqsy estiledi, biraq biz Golovkınmen bolatyn aıqasty kórgimiz keledi. Kelesi jyldyń mamyryn kútkimiz kelmeıdi. Kóp kúttik onsyz da. Golovkın 38 jasta. Trılogııa kelesi jekpe-jekte ótýi kerek. Bıllı Djo Sonderspen bolǵan jekpe-jektiń mańyzy zor, alaıda Golovkınmen jekpe-jekke tikeleı kósheıik», - dedi ol.