Daýys berýshiler exit roll saýalnamasyna jaýap berýge mindetti me

NUR-SULTAN. QazAqparat - Zańgerler daýys bergennen keıin exit roll saýalnamasyn júrgizýshilerdiń jumysyna qatysty aıtty, dep habarlaıdy QazAqparat tilshisi.

Qazaqstan Zańgerler odaǵynyń tóraǵasy Serik Aqylbaıdyń aıtýynsha, exit roll suraqtaryna eki túrli jaýap berýge bolady.

«Siz saýalnama júrgizýshige ózińizdiń kimge daýys bergenińizdi ashyq aıta alasyz. Al eger aıtqyńyz kelmese, «Ózim qalaǵan kandıdatqa daýys berdim» dep qana jaýap qatyńyz. Suraq ıesi naqty jaýap talap etse, Saılaý týraly zańnyń 8-babyn buzyp turǵanyn eskertińiz», - dep keńes beredi zańger.

Zań ǵylymdarynyń doktory álemde mundaı saýalnama júrgizýdiń sátti tájirıbeleri bar ekenin aıtady. Onyń pikirinshe, sondaı sátti úlgilerdi bizge de engizý artyq bolmaıdy.

«Mysal men Ulybrıtanııadaǵy saılaýǵa kýá boldym. Bizde exit roll júrgizýshiler tikeleı tónip turyp suraq qoıady ǵoı. Ol jaqta sál basqashalaý. Siz daýys berý kabınasynan shyqqannan keıin aldyńyzǵa bıýlletenniń shartty kóshirmesin qoıady. Kimge daýys bergenińizdi sol kóshirmege belgilegenshe ózi teris aınalyp turady. Bul áldeqaıda qolaıly ári demokratııaǵa saı tásil», - deıdi Serik Aqylbaı.

Eske salsaq, «Zańgerler ádil saılaý úshin» qoǵamdyq birlestiginiń músheleri exit roll nátıjelerin BAQ-ta jarııalaýdyń tártibi týraly da aıtqan bolatyn.

Sondaı-aq jumys berýshilerdiń qol astyndaǵy qyzmetkerlerden saılaýǵa qatysqan-qatyspaǵany týraly esepti talap etýi zańsyz ekeni jetkizildi.

Elimizde kezekten tys prezıdenttik saılaý aldaǵy 9 maýsym kúni ótedi. Prezıdent laýazymyna 7 kandıdat úmitker.