Daýys berýshi arystyq turǵyn shashý shashsa, saryaǵashtyq zeınetkerge shapan jabyldy

TÚRKІSTAN. QazAqparat – Referendýmda daýys bergen 70 jastaǵy saryaǵashtyq turǵyn Ibadýlla Qalymbetovke shapan syıǵa tartyldy, dep habarlaıdy QazAqparat tilshisi.

Saryaǵash aýdany boıynsha qala, kent jáne aýyldyq okrýgterdegi 79 referendým ýchaskesi saǵat 7-de jumysyn bastady. Alǵash daýys berýshiler arnaıy syılyqtarǵa ıe boldy. Máselen, Kókterek kentinde ornalasqan №672 referendým ýchaskesinde alǵashqy tańdaýyn jasaǵan 70 jastaǵy zeınetker Ibadýlla Qalymbetovke shapan jaýyp, syı-qurmet kórsetildi.

Al, Arys qalasyndaǵy №5 referendým ýchaskesine óz tańdaýyn jasaý úshin kelgen Aıgúl Karabalaeva shashý shashty. Jańa Qazaqstan qurýda júrekjardy lebizin bildirip, kópshilikke sáttilik tiledi.

Aıta ketsek, Túrkistan oblysy Maqtaaral aýdanynyń 85 jastaǵy turǵyny Jandarbek Júsipov alǵashqylardyń biri bolyp daýys bergen edi.