Daýys berý talaptaryn buzý týraly shaǵymdar bolǵan joq – Bas prokýratýra

NUR-SULTAN. QazAqparat – QR Bas prokýrorynyń aǵa kómekshisi Azamat Sarǵazın saılaý zańnamasyn buzý týraly áleýmettik jelilerde taraǵan materıaldarǵa qatysty túsinik berdi, dep habarlaıdy QazAqparat tilshisi.

«Búgin tańnan osy ýaqytqa deıin prokýratýra organdaryna daýys berý sharttaryn buzý týraly shaǵymdar men aryzdar túsken joq. Degenmen jekelegen adamdar áleýmettik jelilerde jasandy rezonans týdyrý maqsatynda «búgin oryn alǵan dep» saılaý zańnamasyn buzýshylyqtary týraly jalǵan materıaldardy taratýdy. Biz osy materıaldardy tekserdik. Olardyń qazirgi saılaý naýqanyna qatysy joq», - dedi Azamat Sarǵazın OKQ-da ótken baspasóz másıhatynda.

Onyń aıtýynsha, WhatsApp messendjeri arqyly saılaý ýchaskeleriniń birinde saılaý komıssııasynyń músheleri aldyn ala qol qoıǵan bıýlletender tabylǵan beınejazba taralǵan. Bul odan buryn ótkizilgen saılaý kezinde Nur-Sultan qalasynda saılaý ýchaskeleriniń birinde júrgizilgen eski jazba ekeni anyqtaldy.

Sondaı-aq Facebook jelisin paıdalanýshy «Qazaqstanda burmalaý bastaldy» degen pikirmen jáshikke bıýlletenderdi salýdyń beınejazbasyn ornalastyrǵan. Alaıda materıaldardy zerdeleý nátıjesi bul vıdeo Reseı eldi mekenderi biriniń saılaý ýchaskesinde jazylǵanyn kórsetti.

«BAQ-ty nemese telekommýnıkatsııa jelilerin paıdalana otyryp, qoǵamdyq tártipti buzý qaýpin týdyratyn jalǵan aqparat taratqany úshin Qylmystyq kodekstiń 274-baby boıynsha qylmystyq jaýaptylyq kózdelgenin eske salǵym keledi. Saılaý protsesi zańdylyǵyn saqtalýyn qadaǵalaý jalǵasyp keledi», - dedi Azamat Sarǵazın.