Daýys berý protsesi birqalypty ótti - Bas prokýratýra

NUR-SULTAN. QazAqparat - Keıbir ýchaskede bir adamǵa birneshe bıýlleten berý derekteri anyqtaldy. Bul týraly búgin QR Bas prokýratýrasy Qoǵamdyq múddeni qorǵaý qyzmetiniń basshysy Saparbek Nurpeıisov aıtty, dep habarlaıdy QazAqparat tilshisi.

«Jalpy daýys berý protsesi birqalypty ótti. Azamattardyń quqyqtaryn óreskel buzýshylyq tirkelgen joq. Saılaý zańnamasyn buzýdyń 19 faktisi anyqtaldy. Atap aıtqanda, zańsyz úgittiń 1 faktisi, azamattardyń qoldaryna birneshe bıýlleten berýdiń 11 faktisi, jáshikke 2-3 bıýlleten salý jáne eki ýchaskede daýys berýdiń 2 faktisi belgili boldy. Bul faktiler boıynsha prokýrorlar 18 ákimshilik is qozǵady. Birneshe bıýllentender berý áreketi boıynsha 12 is, eki nemese odan kóp bıýlleten salýdyń, basqa saılaýshy úshin daýys berýdiń 6 faktisi boıynsha is qozǵaldy», - dedi ol Ortalyq saılaý komıssııasyndaǵy brıfıngte.

Onyń atap ótýinshe, barlyq materıaldar qazir sotta qaralyp jatyr.

«Zań buzýshylyqqa jol bergen komıssııa músheleri jumystarynan shettetildi. Mysaly, Qyzylorda qalasyndaǵy 251 saılaý ýcheskesinde bir saılaýshyǵa 5 bıýlleten berilgeni tirkeldi. Oǵan ákimshilik is 110-bap boıynsha qozǵaldy. 25 AEK kóleminde aıyppul salyndy. Jalpy 2-3 bıýlleten berý faktisi boıynsha Almaty qalasynda, Almaty, Túrkistan oblystarynda, elordada eki ýchaskede bir saılaýshyǵa qatysty prokýrorlar 108-bappen is qozǵady. Olardyń 4-eýi sotta qaraldy. 25 AEK aıyppul salyndy», - dedi S.Nurpeıisov.