Daýsyz jeńiske jetý úshin aıqyn basymdyqpen utý kerek — Bapker Halzova aıqasy týraly
Áleýmettik jelide «qazaqstandyq Valentına Halzova men Panama boksshysy Ateına Bıbechı Bılon jekpe-jeginde tóreshiler bura tartty» degen pikirler kóptep tarala bastady.
Osyǵan oraı Kazinform tilshisi bokstan áıelder quramasynyń bas bapkeri Eldos Saıdalınmen arnaıy tildesip, shaǵyn suhbat alyp úlgerdi.
— Eldos Jánibekuly, osydan birer saǵat buryn Parıjge ózińiz baptap, alyp kelgen Valentına Halzova alǵashqy jekpe-jeginde tóreshiler sheshimimen jeńilip qaldy. Áleýmettik jelide tóreshiler tarapynan bura tartý boldy dep jazyp jatyr. Sizdiń oıyńyzsha kim jeńdi?
— Tóreshi kimniń qolyn kóterdi, sol jeńdi. Kez-kelgen sportshy, kez-kelgen boksshy daýsyz, taza jeńiske jetý úshin, qarsylasyn aıqyn basymdyqpen utý kerek. Sonda ǵana eshkim kúmándanbaıdy.
— Demek, sizdiń tóreshilerge shaǵymyńyz joq qoı?
— Mende shaǵym joq. Halzova ózi de jekpe-jekten keıin tilshilerge bergen suhbatynda qalaı bokstasqanyn, qaı jerden qandaı qatelik jibergenin aıtyp berdi ǵoı. Endi bul taqyrypqa qaıta oralýdyń keregi joq dep oılaımyn.
Aıta keteıik, jekpe-jekten keıin Valentına Halzova:
— Ózimdi úsh raýnd boıy alda boldym dep oılaımyn. Maǵan solaı kórindi. Tóreshilik týraly eshteńe aıta almaımyn. Solaı bolýy kerek shyǵar. Qarsylasym — Olımpıadanyń eki dúrkin júldegeri. Óte tájirıbeli boksshy. Biraq men alǵashqy eki raýndqa qaraǵanda úshinshi raýndta áldeqaıda dálirek boldym, — degen edi.
Aıta keteıik, osyǵan deıin Qamshybek Qońqabaev, Asylanbek Shymbergenov jáne Mahmud Sabyrhan Olımpıada oıyndaryn merziminen aıaqtaǵan bolatyn.
Endi mine, olardyń qataryna Halzova da qosyldy.
Sondaı-aq, osyǵan deıin erler arasynda Nurbek Oralbaı, 51 kelide Sáken Bıbosynov, 63,5 kelige deıingi salmaqta Muhammedsabyr Bazarbaıuly shırek fınalǵa shyqty.
Áıelder arasynda Nazym Qyzaıbaı alǵashqy jekpe-jegin sátti bastady.