Dáýren Seıitqalıev: Maqsatymyz – saılaýdyń ashyq ári ádil ótýin qadaǵalaý

ATYRAÝ. QazAqparat – Elimizde aýyl ákimderin saılaý alǵash ret turǵyndardyń tikeleı daýys berýimen ótip jatyr. Osyǵan baılanysty «Partııalyq emes baıqaý ortalyǵy» qoǵamdyq birlestigi Atyraý oblystyq fılıaly jetekshisi Dáýren Seıitqalıev pikir bildirdi, dep habarlaıdy QazAqparat.

Onyń málimetinshe, Atyraý óńirindegi saılaý ýchaskelerinde daýys berý kezinde zańǵa qaıshy áreketter tirkelmegen.

«Atyraý oblysynda aýyl ákimderiniń saılaýy 36 saılaý ýchaskesinde ótip jatyr. Saılaý ýchaskelerinde 150-ge jýyq baıqaýshy jumys atqarýda. Olar saılaý ýchaskelerine tańǵy saǵat 6:00-den bastap bardy. «Qazaqstan Respýblıkasyndaǵy saılaý týraly» zań talabyn buzýshylyq baıqalǵan joq» -deıdi Dáýren Seıtqalıev.

Onyń aıtýynsha, saılaý ýchaskelerinde daýys berý sanıtarlyq normalarǵa sáıkes ótýde. Saılaýshylardyń ákim saılaýyna qatysý belsendiligi baıqalady.

«Aýyl ákimderin saılaý - elimizdegi demokratııalyq jańǵyrýdyń mańyzdy qadamy. Osynaý úrdiske biz de úles qosýdy kózdedik. Bizdiń negizgi maqsatymyz – saılaýdyń ashyq ári ádil ótýin qadaǵalaý. Turǵyndar bul saılaýǵa qyzyǵýshylyq tanytyp, belsendilikpen daýys berip jatyr. Aýyl ákimin saılaýǵa ár turǵynnyń arnaıy kelip, óz tańdaýyn jasaýy – elimizdiń demokratııalyq jolmen órkendeýine qosylǵan úles» deıdi Dáýren Seıitqalıev.

Eske sala ketelik, buǵan deıin Atyraý oblysynda 36 saılaý ýchaskesinde daýys berilip jatqanyn, saılaýshylar belsendiligi baıqalyp, ákim saılaýyn 125 baıqaýshy baqylaıtynyn jazǵan bolatynbyz.