Dáýren Ermekov Eagle FC chempıony: Aqtaýdaǵy MMA týrnıriniń qorytyndysy

AQTAÝ. QazAqparat – Aqtaýda aralas jekpe-jekten uıymdastyrylǵan Eagle FC 48 & Naiza FC 41 týrnırinde keshtiń basty aıqasy ótip, onda qazaqstandyq faıter Dáýren Ermekov (16-5) pen reseılik Gamzat Hıramagomedov (10-1) kezdesti. QazAqparat bul týraly Sports.kz portalyna silteme jasap habarlaıdy.

Tıtýldyq jekpe-jek EFC-diń orta salmaqtaǵy «ýaqytsha» chempıony beldigi úshin ótti. Bes raýndqa eseptelgen kezdesý sońyna deıin jalǵasqan joq – ekinshi raýndta D.Ermekov qarsylasyn tehnıkalyq nokaýtqa jiberdi.

Osylaısha, Qazaqstan sportshysy kásibı mansabynda 17-inshi jeńisine qol jetkizip, Eagle FC-diń «ýaqytsha» chempıony ataǵyn jeńip aldy. Al Gamzat Hıramagomedov ekinshi ret jeńilip otyr. Jekpe-jek aldynda reseılik sheber qazaqstandyqty jeńetinin aıtqan bolatyn.

Sondaı-aq kesh barysynda rıngte qazaqstandyq Igor Svırıd (20-10) pen reseılik Artýr Gýseınov (27-11-1) ózara myqtyny anyqtady. Orta salmaqtaǵy jekpe-jek úsh raýndqa esepteldi. Alaıda, birinshi raýndta I.Svırıd tehnıkalyq nokaýtqa túsip qaldy. Osylaısha, Artýr Gýseınov MMA-da 28-inshi ret jeńiske jetti. Al Igor Svırıd 11-inshi ret jyǵylyp otyr.

Óner kórsetken taǵy bir qazaqstandyq qarsylasyn jeńe almady. Mýrad Abdýrahmanov (8-1) reseılik Rýslan Shamılovpen (10-3) kezdesti. Bes raýndqa sozylýy tıis bolǵan kezdesý birinshi raýndta aıaqtaldy. R.Shamılov opponentine býyndyrý ádisin paıdalandy. Osylaısha, reseılik jekpe-jek sheberi 11-inshi jeńisine jetip, Naiza FC chempıony atandy. Al Mýrad Abdýrahmanov kásipqoı MMA-da ekinshi ret jeńilistiń aşy dámin tatty. Ol 2017 jyldan beri jeti jekpe-jek ótkizip, barlyǵyn sátti aıaqtap kele jatqan edi.

Sondaı-aq buǵan deıin habarlaǵanymyzdaı, qazaqstandyq Bolat Zamanbekov (3-1) qyrǵyzstandyq Syımyk Eldııarýýlyny (1-0) ekinshi raýndta býyndyrý ádisimen jeńdi.

Jekpe-jek keshinde alǵashqy aıqas qazaqstandyq faıter Meıirbek Tólegenov (3-1) pen ázerbaıjandyq Djeıhýn Godjalı (0-1) arasynda ótti. Jeńil salmaqtaǵy kezdesý úsh raýndqa esepteldi. Tólegenov qarsylasyn birinshi raýndta aýyrtý ádisimen jeńdi.

Al sportshybyz Rýslan Sárıev (13-1) Brazılııa ókili Kaık Alenkardy (10-3) birinshi raýndta tehnıkalyq nokaýtpen jeńdi.

Rıngte jekpe-jek ótkizgen ózge qazaqstandyqtar:

Roman Djomart (2-1) — Djozef Henle (12-4-1, AQSh) — Henle ekinshi raýndta býyndyrý ádisimen jeńiske jetti.

Aslan Óteǵalıev (9-7) — Magomed Al-Abdýlla (9-1-1, Reseı) — jeńis tóreshilerdiń biraýyzdy sheshimimen Al-Abdýllaǵa berildi.

Zahar Rıabov (2-3) — Konstantın Andreıtsev (17-14, Reseı) —Andreıtsev tóreshilerdiń biraýyzdy sheshimimen jeńiske jetti.