Dáýren Abaev zorlyq-zombylyqqa qatysty vıdeolardy buǵattaý jaıynda pikir bildirdi
Aıta keteıik, buǵan deıin QR Bilim jáne ǵylym mınıstri Erlan Saǵadıev oqýshylardyń tóbelesteri jaıynda aıta kele, áleýmettik jelide taraǵan ondaı vıdeolardy buǵattaý qajettigin jetkizgen bolatyn.
«Psıxologtar men muǵalimder áleýmettik jelilerde jaǵymsyz vıdeolardy kórgen boıda aqparat jáne kommýnıkatsııalar mınıstrligine xabar berýi kerek. YouTube jáne taǵy basqa jerde birden buǵattap tastaıtyndaı ózara baılanys bolýy qajet», - dedi E.Saǵadıev.
QR Aqparat jáne kommýnıkatsııalar mınıstri Dáýren Abaevtyń aıtýynsha, búginde Bilim jáne ǵylym mınıstrliginiń ótinishterin qaraý merzimi qysqartyldy. Alaıda qandaı da bir vıdeony buǵattaý úshin áleýmettik jeli ákimshisiniń de ruqsaty qajet.
«Endi, biz barlyq máselelerdi sheshe almaımyz. Iá, Bilim jáne ǵylym mınıstrliginiń ótinishterin qaraý merzimin, jalpy osy saladaǵy ákimshilik protsedýralardy bir saǵatqa deıin qysqarttyq. Alaıda áleýmettik jeliniń ákimshisi de bar. Sondyqtan vıdeony buǵattaý ýaqyty sozylyp ketýi múmkin. Biraq onymen bireý zorlyq-zombylyq faktilerin jasyraıyn dep otyrǵan joq. Biz árbir árekettiń zańdy túrde qaralǵanyn qalaımyz», - dedi D.Abaev jýrnalısterge bergen suxbatynda.
Mınıstrdiń sózine qaraǵanda, qazirgi júıe tek áleýmettik jelilerge ǵana qatysty. Al messendjerlerge taramaıdy. «Biz árbir telefonnyń ishine kire almaımyz», - dep atap kórsetti D.Abaev.
Aıta keteıik, búgin Ortalyq kommýnıkatsııalar qyzmetinde QR Aqparat jáne kommýnıkatsııalar mınıstrliginiń alqa májilisi ótti. Sol jerde Dáýren Abaev tsıfrlyq telexabarlarǵa qosylatyn oblystardy atady. Al Qazaqstannyń telexabarlary Reseıge tarala bastady. Al QR Premer-Mınıstriniń orynbasary - QR Qorǵanys jáne aeroǵarysh ónerkásibi mınıstri Asqar Jumaǵalıev aqparattyq texnologııalardy damytý boıynsha birqatar tapsyrmalar berdi.