Dáýren Abaev jýrnalısterdi baspanamen qamtýdyń mashaqaty týraly aıtyp berdi
«Bizde buqaralyq aqparat quraldarynyń 95 protsenti - jekemenshik kompanııalar. Sol sebepti olar baspanamen qamtý máselesin ózderi sheshýi kerek. Mysaly, muǵalimderdiń barlyǵy bıýdjettik qyzmetkerler bolyp sanalady. Al jýrnalısterdiń basym bóligi atalǵan sanatqa jatpaıdy. Osy máseleni qalaı sheshemiz? Jýrnalıstiń mártebesin qalaı anyqtaımyz? Endi, qazirgi kezde memleket baspanamen qamtýǵa qatysty biraz sharalardy qolǵa alyp jatyr ǵoı. Sonyń ishinde «7-20-25» baǵdarlamasy da bar», - dedi D.Abaev xalyqqa esep berý kezdesýi kezinde.
Mınıstrdiń aıtýynsha, memleketke qaraıtyn buqaralyq aqparat quraldaryn baspanamen qamtý jaıy nazardan tys qalmaıdy.
«Ol másele bir jerde sheshiledi, endi bir jerde sheshilmeı jatady. Sebebi jataqxana bar. Degenmen, biz mınıstrlikke qarasty árbir uıymnyń baspana máselesin jeke-jeke qaraıtyn bolamyz. Naqty usynystar bolsa, biz árdaıym qoldaýǵa daıynbyz. Ondaı usynystar bar», - dep atap kórsetti D.Abaev.
Aıta keteıik, mınıstr Abaev kelesi jyly tirkelmegen telefondarǵa uıaly baılanystyń qosylmaıtynyn taǵy bir márte eske saldy.
Atalǵan sharalar jyldyń ortasynda bastalady.