Dáýren Abaev japondyq áriptesterimen tsıfrlandyrý máselelerin talqylady

TOKIO. QazAqparat - QR Aqparat jáne kommýnıkatsııalar mınıstri Dáýren Abaev Tokıoǵa jumys sapary barysynda Japonııa Іshki ister jáne kommýnıkatsııalar mınıstrliginiń basshylary, sonymen qatar eldegi jetekshi ǵylymı-tehnıkalyq kompanııalardyń ókilderimen kezdesti, dep habarlaıdy «QazAqparat» HAA-nyń Qytaıdaǵy menshikti tilshisi.

D.Abaev Іshki ister jáne kommýnıkatsııalar mınıstri Seıko Nodamen kezdesý barysynda aqparat jáne kommýnıkatsııalar salasyndaǵy eki el arasyndaǵy baılanysty ary qaraı damytý máselelerin talqylady, onyń ishinde «Tsıfrlyq Qazaqstan» baǵdarlamasynyń júzege asyrylýy da bar.

Sonymen qatar, qazaqstandyq delegatsııa N EC korporatsııasynyń basshylarymen kelissózder júrgizdi. Atalmysh korporatsııa - elektrondyq, kompıýterlik tehnıkalar, telekommýnıkatsııalyq qurylǵylar qurastyratyn, sondaı-aq mobıldik jáne turaqty jelilerge, keńjolaqty jáne korporatıvti júıelerge, jartylaı ótkizgish salasyna, IT jáne ınternet qurylǵylarǵa, meteorologııalyq jer serikterine arnalǵan baǵdarlamalar jasaıdy.

NEC korporatsııasy Toyota Tsusho kompanııasymen birigip Qazaqstannyń temirjol salasynda «Neo Face» adam kelbetin tanıtyn tehnologııasyn engizýdi josparlaýda.

Iokosýka ınnovatsııa-zertteý parkiniń bas hatshysy (Yokosuka Research Park - YRP) Tetsýıa ıAsýımen kelissóz barysynda YRP-men Qazaqstanda qurylǵan «Astana Hub» IT-startap halyqaralyq tehnoparkimen yntymaqtastyq jóninde aldyn ala kelisimge qol jetkizildi.

Qazaqstandyqtar Wireless Technology Park - 2018 halyqaralyq kórmesinde symsyz tehnologııalar salasyndaǵy sońǵy jetistiktermen tanysyp, Fujitsu tsıfrlyq transformatsııalar kompanııasynyń ortalyǵyna bardy, sonymen qatar, japondyq Toyota Tsusho alpaýyt kompanııasynyń atqarýshy dırektory M.Akııamamen ekijaqty yntymaqtasý máseleleri talqylandy.