Dáýren Abaev «Z» urpaǵyn sıpattap berdi
«Ózderińizge belgili, QR Tuńǵysh Prezıdenti – Elbasy Nursultan Nazarbaev 2019 jyldy Jastar jyly dep jarııalady. Ondaǵy maqsat – jastarymyzǵa ózderin jetildirýine, tabysty damýyna jáne ál-aýqatyn nyǵaıtýǵa múmkindik jasaý. Bul jerde eskeretin másele – aýqymy men mańyzy boıynsha Jastar jylyn tek 12 aıǵa eseptelgen is-sharalardyń kúntizbelik jospary dep qarastyrýǵa bolmaıdy. Jastar saıasaty salasyndaǵy Úkimet júzege asyratyn keshendi bastamalar júıeli, eń bastysy, uzaq merzimdi áleýmettik nátıje týdyrýy tıis», - dedi mınıstr.
Onyń aıtýynsha, negizgi is-sharalar 3 jylǵa eseptelgen. Al memlekettik qoldaýdyń eń tıimdi sharalary memlekettik jastar saıasatynyń on jyldyq Tujyrymdamasyna kiredi. Іs-sharalardy josparlaý jáne júzege asyrý qazaqstandyq jastardyń negizgi demografııalyq sıpattamalaryn eskere otyryp júrgizildi.
«Búginde Qazaqstanda úsh mıllıon segiz júz myńnan astam jastar bar. Bul jalpy halyq sanynyń 21 paıyzy. Jas ólshemi boıynsha 1 mıllıon 181 myń jas ıývenaldyq topqa jatady – bul 14 jastan 18 jasqa deıingi adamdar. Postıývenaldy topqa – 19-dan 23 jasqa deıingi 1 mıllıon 160 myń azamat jatady. 24-29 jas aralyǵyndaǵy eresek top bir jarym mıllıon adamdy quraıdy. Tutastaı alǵanda, bul demografııalyq kórinis búkil álemde ártúrli jyldamdyqpen júrip jatqan urpaqaralyq tranzıt protsesin jaqsy beıneleıdi. Bul jerde «Y» urpaǵy men «Z» urpaǵy arasyndaǵy shekarany anyqtaıtyn qundylyqtar men dúnıetanymdyq sıpattamalardyń aýysýy týraly sóz bolyp otyr. Jalpy bizdiń áleýmettik ólshemderimiz «Z» urpaǵy, 1995 jyldan keıin týǵan jastar týraly jalpy qabyldanǵan uǵymdarmen úılesedi«,- dedi mınıstr.
Osy oraıda Dáýren Abaev «Z» urpaǵyn sıpattap berdi.
«Olar tsıfrlyq qyzmetterdi joǵary deńgeıde tutynady. Olardyń eńbekke, aqsha men bos ýaqytyn ótkizýge degen ustanymdary qalyptasqan dástúrli kózqarastardan ózgeshe. Mysaly, olar jumysty kóbine úıde isteýge beıim, olar úshin jumys berýshiniń mıssııasy men qundylyqtary úlken mańyzǵa ıe, mundaı jastarymyz mobıldi jáne turǵylyqty jerin jıi ózgertýge áýes. Sheteldik áleýmettanýshylardyń aıtýynsha, absolıýttik mánde bul óte kedeı, biraq eń tabysty urpaq. Aldyńǵy býynmen salystyrǵanda olardyń jyljymaıtyn múlki nemese kóligi joq, biraq yńǵaıly apartamentterdi jalǵa alyp turýǵa múmkindikteri bar, Uber qosymshasyn paıdalanady, al qarajatyn «qysyltaıań kezge» dep keıinge jınaýdyń ornyna, álemdi emin-erkin, eshqandaı arnaıy týrıstik joldamasyz aralaýdy qalaıdy«, - dedi Abaev.