Dáýren Abaev teńge baǵamynyń qubylýyna qatysty pikir bildirdi

ASTANA. QazAqparat - QR Aqparat jáne qoǵamdyq damý mınıstri Dáýren Abaev Elbasy Nursultan Nazarbaev prezıdenttik ókilettigin toqtatqannan keıin teńge baǵamynyń qubylýyna qatysty pikir bildirdi, dep habarlaıdy QazAqparat tilshisi.

«Meniń oıymsha, osy aptaǵa deıin prezıdenttik ókilettiktiń berilýi osylaısha typ-tııanaqty ótetinin eshkim de boljaı almaǵan shyǵar. Dúrbeleń bolǵan joq. Talqylaýlar, boljamdar boldy. Mundaı jaǵdaıda oryn alýy kútiletin dúrlikpe boldy, biraq dúrbeleń emes», - dedi mınıstr «Habar» telearnasyndaǵy «Ashyq dıalog» baǵdarlamasynda.

«Buǵan kóp jaǵdaıda Elbasynyń halyqqa degen ákelik qamqorlyǵymen aıtylǵan dáleldi ári baısaldy sózderi yqpal etti dep oılaımyn. Tuńǵysh Prezıdent mártebesi, sondaı-aq onyń Qaýipsizdik Keńesindegi jáne «Nur Otan» partııasyndaǵy tóraǵalyǵy - baǵyt-baǵdar sabaqtastyǵynyń kepili ekendigi de mańyzǵa ıe. Ótpeli kezeńniń tynysh jáne turaqty ótýiniń kepildigi», - dedi ol.

Valıýta aıyrbastaý núktelerine qatysty toqtalǵan vedomstvo basshysynyń aıtýynsha, Túńǵysh Prezıdenttiń málimdemesinen keıin týyndaǵan baǵamnyń azdaǵan qubylýy, tar aýqymdaǵy adamdardyń qarjylyq alǵyrlyqtarynyń nátıjesi.

«Degenmen, Ulttyq bank basshysy Erbolat Dosaev málim etkendeı, mereke kúnderinen keıin baǵam turaqtanady», - dep qorytyndylady mınıstr.

Esterińizge sala keteıik, 19 naýryzda Nursultan Nazarbaev el Prezıdenti retinde ókilettigin toqtatatyny týraly málimdedi.

QR Konstıtýtsııasyna sáıkes, el basqarý ókilettigi sol kezdegi QR Parlamenti Senatynyń tóraǵasy Qasym-Jomart Toqaevqa tapsyryldy.