Dáýren Abaev Táýelsizdiktiń 3 negizgi jetistigin atady
«Táýelsizdiktiń 30 jyldyǵyn kúrdeli kezeńde atap ótkenimizdi bilesiz. Pandemııa áli basylǵan joq. Onsyz da ekonomıkaǵa, azamattardyń áleýmettik turmysyna da qatty áser etken bolatyn. Nesin jasyramyz, jalpy optımızım deńgeıine aýyr soqqy boldy. Mundaı sátterde qarapaıym adamı ókinishterdi túsinýge bolady. Synap-mineýge, nıgılızmge uryný ońaı mundaıda. Biraq bul ádiletsiz. Biz qalyptasqan memleket qura aldyq. 30 jyldyń ishinde damý jolynda úlken qadam jasadyq. Bul jerde úsh fýndamentaldy qorytyndyny bólip aıtýǵa bolady dep oılaımyn. Birinshi, biz birlik pen kelisimdi saqtaı aldyq. Bul týraly kóp aıtylyp júr ǵoı. Ol durys ta. Biz árdaıym judyryqtaı jumylsaq qana damýǵa qabiletti bolatynymyzdy este saqtaýymyz kerek. Qaqtyǵystardyń, kemsitý men bólinýdiń aparatyn jeri belgili», -dedi ol «Ashyq dıalog» suhbatynda.
Aıtýynsha, ekinshi fýndamentaldy jetistik – azamattarǵa degen qamqorlyq.
«Áleýmettik saıasatymyzdy synaı berýge bolady. Biraq bizdegideı áleýmettik paketi aýqymdy elderdi saýsaqpen sanap alýǵa bolady. Biz ataýly áleýmettik kómek te berip otyrmyz. Bizde bazalyq medıtsına aqysyz. Joǵary oqý oryndaryna granttar bólinip keledi. Kolledjderge túsý tegin. Bizde jeńildikpen turǵyn úı nesıesin alýǵa bolady. Osyndaı kóptegen sharalar bar.
Úshinshisi – reformatorlyq rýh. Kóptegen ólshemder boıynsha biz TMD elderiniń arasynda birinshi oryndamyz. Biz túrli radıkaldy reformalardy birinshi bolyp júrgizdik. Tartymdy ınvestıtsııalyq klımat qalyptastyrdyq. Túsinikti zeınetaqy reformasyn da birinshi biz júrgizdik. Elektrondy Úkimetti de birinshi bolyp qurdyq. Ien dalada qala salyp úırendik», - degen Prezıdent ákimshiligi basshysynyń birinshi orynbasary qazaqstandyq gandbolshylardyń kópshilikti súısintken vıdeosyn eske aldy.
«Táýelsizdiktiń arqasynda biz batyl, talapty, patrıot jas býyn tárbıeleı aldyq. Mysal izdesek, alysqa baryp qajeti joq. Jýyqta ǵana Ispanııadaǵy gandboldan ótken Álem chemıpıonatynda bizdiń qyzdar eski Gımndi qosqan kezde abdyrap qalmaı, qazirgi memlekettik Ánurandy akapello stılinde shyrqap berdi. Bul sondaı bir mega erlik emes shyǵar. Biraq jastardyń óz elin maqtan tutatynyn, onyń abyroıy úshin kúresýge daıyn ekenin kórsetip berdi», - dedi Dáýren Abaev.