Dáýren Abaev: Tatýlyqtyń týy qısaıǵanda azattyq ýystan shyqty

NUR-SULTAN. QazAqparat – QR Prezıdenti ákimshiliginiń basshysynyń birinshi orynbasary Dáýren Abaev Táýelsizdiktiń 30 jyldyǵyna arnalǵan ǵylymı-praktıkalyq konferentsııada erkindikti saqtaýdaǵy birliktiń mańyzyna toqtaldy, dep habarlaıdy QazAqparat tilshisi.

«Babalarymyz bórili baıraq astynda birikken tusta Baıkaldan Balqanǵa deıingi alyp aýmaqty erkin jaılady. Arǵy tegimiz saq, ǵun taıpalary Eýrazııa tósinde qýatty memleket quryp, tutas adamzat damýyna eleýli áser etti. Halqymyz orta ǵasyrlyq asa qýatty ımperııa - Ulyq ulystyń ózegin qurady. Keıinnen osy jasampazdyq dástúrin jalǵastyryp, Qazaq handyǵynyń shańyraǵyn kóterdi. At tuıaǵyn tozdyryp, atan belin úzdirip júrip, urpaǵyna búgingi ulan baıtaq jerimizdi mura etti. Al tatýlyqtyń týy qısaıǵanda azattyq ýystan shyǵyp ketti. Ásirese, jıyrmasynshy ǵasyrdyń synaǵy qazaq úshin óte aýyr boldy», - dedi Dáýren Abaev «Kóshbasshylyq. Turaqtylyq Progress» atty konferentsııada.

Onyń aıtýynsha, qazaq halqy HH ǵasyrdyń alǵashqy jartysynda asa zardapty synaqtan aman ótken.

«Bar-joǵy jarty ǵasyrdyń ishinde birneshe alapat qasiretti, saıası qýǵyn-súrgindi, dúnıejúzilik soǵystardy bastan keshirý, jurtymyzdy eseńgiretip tastaǵany jasyryn emes. Osyndaı zobalańdar kezinde tilimiz ben salt-dástúrimizge súıenip, ult retinde saqtaldyq. Tól qundylyqtarymyzǵa taban tirep, qaıta eńse tiktedik, egemendikke qol jetkizdik. Degenmen, bostandyqtyń synaǵy bodandyqtan kóp bolmasa, az emes. Táýelsizdikti endi alǵan tusta Altaıdan Kaspııge deıingi alyp aýmaǵymyz bolǵanymen, shekaramyz shegendelmegen edi. Jerimizdiń asty-ústi baılyqqa toly bolǵanymen, ony ózimiz ıgerip jatqan joq edik. Múmkindikterimiz mol bolǵanymen, qoǵamdaǵy sheshilmegen túıindi túıtkilder odan da kóp bolǵan. Sondyqtan azattyqtyń tańy atqanda el tizginin Nursultan Nazarbaev sııaqty kóregen saıasatkerdik ustaýy qazaqtyń baǵy deýge bolady», -dedi Prezıden ákimshiligi basshysynyń birinshi orynbasary.