Dáýren Abaev: Tabysty qazaqstandyqtardy qoǵammen birlesip izdeımiz
«Qurmetti dostar! Áleýmettik jelilerdiń kómegimen «Qazaqstandaǵy 100 jańa esim» jobasyna qoldaý kórsetýge daıyn qoǵam belsendilerimen kezdesýdi úılestirýge jáne uıymdastyrýǵa bir aptaǵa jýyq ýaqyt ketti. Meniń oıymsha, qoǵamdyq bastama kótermeı, tek qana memlekettik organdardyń kúsh-jigerimen mundaı jobany uıymdastyrý múmkin emes. Sondyqtan, Mahabbat Esen, Zınaıda Pak, Pavel Koktyshev, Arman Nurǵazın jáne Erjan Baǵdatovtarmen birlese otyryp, táýelsizdik jyldarynda zor tabysqa jetkenimen halyqqa esimi beımálim qazaqstandyqtardy izdep-tabýǵa, qoǵamǵa tanytýǵa azamattyq qoǵammen birlesip áreket jasaý týraly sheshim qabyldadyq»,- dep jazdy mınıstr óziniń paraqshasynda. Dáýren Áskerbekulynyń aıtýynsha, atalǵan toptyń ataýy ázirshe - «100 Bıýro». «Aldaǵy josparlarymyz týraly ózimizdiń áleýmettik jelilerdegi jazbalarymyzda turaqty habarlap otyramyz»,-dedi mınıstr.
Aıta keterligi, buǵan deıingi ótken jumys tobynyń otyrysynda Dáýren Abaev qandaı oqıǵalar, qandaı tulǵalar «Qazaqstandaǵy 100 jańa esim» jobasyna kirýi qajettigin túsindirip bergen. Sol otyrysta vedomstvo basshysy: «Biz jurtqa esimi tanys adamdarǵa emes, óz aramyzda júrgen áli halyq bilmeıtin tabysty qazaqstandyqtarǵa nazar aýdarýymyz kerek»,- dep qadap aıtty.
Mınıstrdiń paıymdaýynsha, Elbasy usynǵan jobanyń negizgi maqsaty - táýelsizdik jyldarynda zamanaýı Qazaqstannyń damýyna belgili bir úles qosqan adamdardy úlgi ete otyryp, qoǵamdaǵy tabystylyq ıdeıalaryn, merıtokratııa qaǵıdattaryn, básekege qabilettilikti, naqty adamdardyń mysalynda pragmatızm jáne bilim mádenıetin nasıhattaý jáne aqparattyq jaǵynan qoldaý jolymen qoǵamdyq sanany jańǵyrtý bolyp tabylady. - Bul - jas urpaqqa ómir joly ónege bolarlyq bizdiń zamandastarymyzdyń tabysynyń tarıhy. Olardyń ózgelerden aıyrmashylyǵy, ózin-ózi damytýǵa jáne ózin-ózi oqytýǵa degen turaqty qulshynysy ekeni anyq,- dep túsindirdi mınıstr.
Atap aıtarlyǵy, jobaǵa qaı salada atqaratyn qyzmetine qaramastan, tabysqa jetken elimizdiń kez-kelgen azamatynyń tarıhy tańdap alynady. «Qazaqstandaǵy 100 jańa esim» jobasyndaǵy tabystylyq degende elimizdiń ómiriniń ártúri salalarynda óziniń jeke basynyń qasıetimen, talantymen, bilimimen jáne eńbekqorlyǵynyń arqasynda damýǵa qol jetkizgen, qazaqstandyq armandy júzege asyrǵan qarapaıym adamdardy aıtyp otyrmyz»,- dedi D. Abaev.
Memleket basshysy Nursultan Nazarbaev «Bolashaqqa baǵdar: rýhanı jańǵyrý» atty maqalasynda qazaqstandyqtardyń jetistikteriniń tarıhyna jurttyń nazaryn aýdarý úshin «Qazaqstandaǵy 100 jańa esim» jobasyn iske asyrýdy tapsyrǵan bolatyn. «Táýelsizdigimizdiń jylnamasy jazyla bastaǵanyna nebári 25 jyl boldy. Árıne, jasalǵan jumystardyń mańyzy men aýqymyna eshbir kúmán joq. Degenmen, osy qyrýar isti atqarǵan, el damýyna zor úles qosqan azamattardyń ózderi men olardyń tabysqa jetý tarıhy ádette qurǵaq faktiler men tsıfrlardyń tasasynda qalyp qoıady. Shyn máninde, Qazaqstannyń árbir jetistiginiń artynda alýan túrli taǵdyrlar tur»,- dep jazdy Elbasy atalǵan maqalada.