Dáýren Abaev sýrdlımpıadashymen sot týraly: Apellıatsııaǵa beremiz

ASTANA. QazAqparat – Jarystardaǵy jeńis úshin aqshalaı yntalandyrý tólemi - zańnamamen jáne arnaýly reglamentpen retteletin standartty protsedýra. Al Erkebulan Qanafındi aqshalaı yntalandyrý bul erejege qarama-qaıshy keledi. Bul týraly Mádenıet jáne sport mınıstri Dáýren Abaev málim etti, dep habarlaıdy QazAqparat tilshisi.

«Ol dzıýdodan ulttyq sýrdlımpıada quramasynyń múshesi emes. Ol quramamen oqý-jattyǵý jıynynan da, jan-jaqty medıtsınalyq tekserýden de, Ulttyq antıdopıng ortalyǵynan dopıng baqylaýynan da ótken joq», - dep jazdy mınıstr Facebook paraqshasynda.

Onyń atap ótýinshe, Ulttyq sýrdlımpıada komıteti sportshyny jarysqa barlyq erejeden aınalyp ótip jáne ókiletti organnyń kelisiminsiz aparǵan.

Buǵan deıin Astana qalasynyń mamandandyrylǵan aýdanaralyq ákimshilik soty QR Mádenıet jáne sport mınıstrligi men 2022 jylǵy Sýrdlımpıada chempıony Erkebulan Qanafın arasyndaǵy daýǵa qatysty sheshim shyǵarǵanyn habarlaǵan edik. Ol sheshimge sáıkes, mınıstrlik 2020 jylǵy 27 naýryzdaǵy Qazaqstan Respýblıkasy Úkimetiniń qaýlysymen bekitilgen mólsherdegi aqshalaı yntalandyrý tólemin Erkebulan Qanafınge tóleýge mindetti.