Dáýren Abaev Shymkenttegi atyshýly oqıǵa týraly pikir bildirdi
Shymkent qalasynyń №1 klınıkalyq aýrýhanasynyń bas dárigeri Abylaı Donbaevty adam aǵzasyn zańsyz alý aıybymen polıtsııa ustaǵan edi.
«Іstiń anyq-qanyǵyna jetpegendikten, ázirge pikir bildirý qıyn. Mundaı oqıǵa ókinishke qaraı, asa qajet bolyp otyrǵan donorlyq pen transplantologııa ınstıtýtyn qaralaıdy. Árıne, bul salada álemde de, elimizde de birli-jarym oqıǵalar bolady. Biraq, Qazaqstanda mundaı zańsyz áreket tamyr jaıǵan dep aıtýǵa bolmaıdy, óıtkeni mundaı qylmys óte sırek kezdesedi», - dedi mınıstr «Habar» arnasyndaǵy «Otkrytyı dıalog» baǵdarlamasynda.
Mınıstr sońǵy jyldary Qazaqstan medıtsınasynyń organ almastyrýda úlken jetistikke jetkenin atap ótti. Bizdiń dárigerler eń kúrdeli otalardy jasap, sheteldik klınıkalarda tájirıbe jınaqtap júr.
«Meniń bilýimshe, Qazaqstanda bir jylda osyndaı úsh júzge jýyq ota jasalady. Munyń qandaı qıyn ekenin, zergerlik jumyspen teń ekenin bilesizder. Eger ólimnen keıingi erikti donorlyqty damytsaq, kóbirek adamnyń ómirin qutqaryp qalar edik. AQSh-ta júrgizýshi kýáliginde kóptegen adamdardyń qaza tapqan jaǵdaıda donorlyqqa kelisim beretindigi kórsetilgen. Qazaqstanda bul áli jolǵa qoıylmaǵan», - dedi ol.
Mınıstrdiń aıtýynsha, qazaqstandyqtar organdardyń zańsyz naryqta satylyp ketýinen qorqady nemese dinı sebepterge baılanysty kelisim bermeıdi.
«Alaıda, men dinbasylarmen sóıleskenimde, birde-bir dástúrli dinniń donorlyqqa tyıym salmaıtynyn aıtty. Bul turǵyda aýqymdy túsindirý jumystaryn júrgizý qajet. Men bul týraly oılanyp júrdim jáne jaqyn arada ólimnen keıingi donorlyqqa kelisim beretinim týraly qujatqa qol qoıamyn», - dedi D. Abaev.