Dáýren Abaev sheteldikterge «Tsıfrlyq Qazaqstan» týraly aıtyp berdi

ASTANA. QazAqparat - QR Aqparat jáne kommýnıkatsııalar mınıstri Dáýren Abaev Bishkek qalasynda ótken xalyqaralyq konferentsııaǵa qatysty. Atalǵan jıynǵa Ońtústik Koreıa, Qyrǵyzstan, Belarýs pen Qazaqstannyń IT mamandary jınaldy, dep habarlaıdy QazAqparat tilshisi.

Mınıstr Abaev «Tsıfrlyq Qazaqstan» baǵdarlamasynyń bes baǵytyn qysqa ári túsinikti tilde jetkizdi. Birinshi baǵyt ol - ınfraqurylymdy damytý.

«Qazaqstanda 25 jyldyń ishinde 20 myń shaqyrym baılanys jelileri tartyldy. Endi, Prezıdent úsh jyldyń ishinde dál sondaı jospar oryndalsyn dep otyr. Osynyń nátıjesinde barlyq eldi mekenderde sapaly baılanys bolady. Demek, taǵy shamamen 3 mıllıon adamǵa baılanys jelileri tartylady», - dedi D.Abaev.

Ekinshi baǵyt - kreatıvti qoǵamdy qurý. Bul degenimiz, xalyq tsıfrlandyrýdyń barlyq jańalyqtary - san alýan qosymshalar, onlaın qyzmetter jáne taǵy basqa ınnovatsııalardy keńinen qoldanýy qajet. Ol úshin kreatıvti qoǵam, ıaǵnı zaman talabyn túsinetin azamattar kóp bolýy tıis.

«Árıne, xalyq tsıfrlandyrýdy túsinbese, osy saladaǵy sharalardy atqarý qıyn. Sol sebepti el azamattaryn tsıfrlyq negizderge jan-jaqty úıretý týraly sheshim qabyldandy», - dep atap kórsetti D.Abaev.

Úshinshi baǵytqa sáıkes, otandyq ekonomıkany tsıfrlandyrý qajet. Sonda eńbek ónimdiligi artady, barlyq protsester jyldam júredi. Baǵdarlamaǵa sáıkes, úsh jyldyń ishinde shamamen 120 kásiporyn elektrondy basqarý júıelerin engizedi.

«Tórtinshi baǵyt - tsıfrlyq memleket. Barlyq anyqtamalar elektrondy formatta berilýi kerek. Al besinshi baǵyt boıynsha biz tyń ıdeıalar men texnologııalar úshin orta qalyptastyrýymyz qajet», - dedi mınıstr Abaev.

Aıta keteıik, Bishkekte ótken konfentsııada mınıstr blokcheın texnologııasyn engizýdiń qazaqstandyq tájirıbesi týraly aıtyp berdi.