Dáýren Abaev sheteldik prodıýserlerge birlesip serıal túsirýdi usyndy

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev sheteldik prodıýserler men telearna ókilderine birlese serıal túsirýdi usyndy, dep habarlaıdy QazAqparat tilshisi.

«Men Reseıden, Qytaıdan, Polsha men Úndistannan kelgen áriptesterime resmı túrde aıtarym – biz birlesken joba jasaýǵa daıynbyz. Arnaıy qarajat bólip, jeke ári sapaly ónim daıyndaýǵa ázirmiz. Ol ónimdi Qazaqstanda da, shetelde de túsinikti bolatyndaı shyǵarýǵa bolady. Eger sizderdiń taraptaryńyzdan qandaı da bir usynys bolsa – marhabat. Biraq, eger biz seriktese jumys istesek, ol eldiń telearnasymen bizdiń eldiń telearnasy birlese jumys júrgizgen jón bolar edi. 2020 jyly birlesken joba ázirleıik. Biz kelesi jyldyń aıaǵynda 2 mıllıon dollardan artyq qarajat tapty dep maqtana aıtyp otyratyndaı (kúldi) sol birlesken ónimdi shyǵaraıyq», - dedi Dáýren Abaev elordada ótip jatqan Astana Media Week sharasynda.

Aıta keterligi, búgingi sharaǵa Polsha, Úndistan, Reseı men Qytaı elderinen prodıýserler men rejısserler kelgen bolatyn.

Eske sala ketsek, elordadaǵy «Qazmedıa» ortalyǵynda úsh kúnge sozylatyn Ortalyq Azııadaǵy eń iri medıa-oqıǵa — Astana Media Week ótip jatyr. Astana Media Week-tiń birinshi kúni serıaldyq ónimderdi ázirleý jáne shyǵarý taqyrybymen jáne salyq preferentsııalary, kıno prokatynyń sharttary, mazmuny, fılm óniminiń shyǵarmashylyq deńgeıi jáne onyń demeýshiler úshin tartymdylyǵy taqyrybymen erekshelenedi.