Dáýren Abaev shetelde tirkelgen kólikterge qatysty pikir bildirdi

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev ózge elde tirkelgen avtokólikterge tyıym salýǵa qatysty pikir bildirdi, dep habarlaıdy QazAqparat tilshisi.

«Bul sharalarda qosarlanǵan standart joq. Adamdar shetelde tirkelgen avtokólikti satyp alǵanda esepke qoıý, baj jáne salyq tóleý kerektigin jaqsy bildi. Biraq, soǵan qaramastan sanaly túrde syrttan kólik ákelip, ony tirkeýge qoımady. Munda avtokóliktiń qaýpi joǵary múlik ekenin, onyń ıesi bolýy kerektigin túsingen jón. Endi tirkelmegen kólik ıeleri jol erejesin buzyp, apat ornynan qashyp, esh jazaǵa ilinbeıtinderin bildi. Osyndaı júrgizýshilerdiń kesirinen ІІM deregi boıynsha, 132 adam kóz jumdy», - dedi mınıstr Habar arnasyndaǵy «Ashyq dıalog» baǵdarlamasynda.

Onyń aıtýynsha, kóptegen kólikterge tyıym salynǵan, urlanǵan nemese kepilde tur. Eger olardyń ıelerine sot prıstavy kelse, bul múlik zańdy túrde alynady.

«Jáne eń qyzyǵy, osy kólikterdiń qazaqstandyq ıeleri memleketten ádildikti talap etip, narazylyq bildiredi. Olar salyq pen aıyppuldan jaltarady. Elimizde sheteldik tirkeýi bar 200 myń mashına bar. Olar bizdiń jolymyzda júredi, aýamyzdy lastaıdy, biraq olar úshin ózimizdiń zańdy saqtaıtyn azamattarymyz aqy tóleıdi», - dedi D. Abaev.