Dáýren Abaev shekteý sharalary týraly: Eýropada vaktsına almaǵandar lokdaýnǵa jiberiledi

NUR-SULTAN. QazAqparat – QR Prezıdenti Ákimshiligi Basshysynyń birinshi orynbasary Dáýren Abaev «kók» mártebeli turǵyndardyń Nur-Sultanda saýda, oıyn-saýyq ortalyqtaryna kirgizilmeýine qatysty pikir bildirdi, dep habarlaıdy QazAqparat tilshisi.

«Bul sheshimniń óte qarapaıym qısyny bar – saýda ortalyqtary ásirese mereke qarsańynda halyq jıi baratyn basty orynǵa aınalady. Tıisinshe, onda adamdar neǵurlym kóp júrse, aýrý juǵý yqtımaldyǵy da aıtarlyqtaı kólemdi bolady. Eger keı turǵyndar astanalyq dárigerler qabyldaǵan sheshimmen kelispese, ony quqyq pen bostandyqtyń buzylýy dese, Avstrııany mysal ete alamyn. Onda 15 qarashadan bastap vaktsına salmaǵan 2 mln azamat úshin lokdaýn bastaldy. Shekteý sharalary saqtalmasa myń jarym eýro aıyppul salynady. Meniń bilýimshe, mundaı sheshim rojdestvolyq merekeler qarsańynda qarastyrylyp jatyr jáne Eýropanyń basqa elderi de osylaı jasaýdy uıǵaryp otyr», - dep jaýap berdi Dáýren Abaev.

Eske sala ketsek, elordanyń bas memlekettik sanıtarlyq dárigeriniń qaýlysyna sáıkes, 15 qarashadan bastap jumys kúnderi jáne demalys kúnderi saýda, oıyn-saýyq ortalyqtaryna «jasyl» mártebesi barlar ǵana kire alady.