Dáýren Abaev Prezıdenttiń Mıýnhenge sapary týraly: Elimizdiń damý strategııasyn kórsetetin jaqsy múmkindik

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev Prezıdent Qasym-Jomart Toqaevtyń Mıýnhen qaýipsizdik konferentsııasyna qatysýy týraly pikir bildirdi, dep habarlaıdy QazAqparat tilshisi.

«Sapar iskerlik sıpatta óte mazmundy ótti. Prezıdent ózge eldiń basshylarymen jáne iri transulttyq kompanııa basshylyǵymen onnan astam kezdesý ótkizdi. Mıýnhen syndy konferentsııalar aýqymdy halyqaralyq qoǵamdastyqqa elimizdiń damý strategııasyn, Qazaqstannyń syrtqy saıası baǵytyn kórsetýge óte yńǵaıly», - dedi mınıstr «Habar» arnasyndaǵy «Ashyq dıalog» baǵdarlamasynda.

Onyń aıtýynsha, mundaı konferentsııalar tıisti ókildik deńgeıge shyǵyp, keń qamtylýǵa múmkindik beredi.

«Bul kezdesýler – jaı ǵana pikir almasý emes, elimizge quıylatyn ınvestıtsııa máseleleri jáne ekijaqty yntymaqtastyqtyń negizgi baǵyttary boıynsha daıyndyq bolyp sanalady. Sonymen birge, bul – óńirlik qaýipsizdikpen qamtamasyz etý, terrorızmmen, esirtki tasymalymen, uıymdasqan qylmyspen kúres máseleleri boıynsha óz ustanymymyzdy jarııalaıtyn jaqsy múmkindik», - dedi D. Abaev.

Buǵan deıin habarlanǵandaı, 14-16 aqpan kúnderi Memleket basshysy Qasym-Jomart Toqaev Germanııanyń Mıýnhen qalasyna jumys saparymen bardy.