Dáýren Abaev: «Ótken jaz mańyzdy oqıǵalarǵa toly boldy»

ASTANA. QazAqparat - «Habar» telearnasyndaǵy «Otkrytyı dıalog» baǵdarlamasyna qatysqan Aqparat jáne kommýnıkatsııalar mınıstri Dáýren Abaev ótken jazdyń asa mańyzdy oqıǵalaryn atady. Vedomstvo basshysy qoǵamda qyzý talqylanǵan taqyryptardan bólek úsh negizgi oqıǵaǵa erekshe toqtaldy. Olar - Islam Yntymaqtastyǵy Uıymynyń Astanadaǵy sammıti, Qazaqstan men AQSh memleket basshylarynyń telefonmen sóılesýi jáne turan jolbarysynyń tuqymyn ósirýdi qalpyna keltirý.

«Ótken jaz elimiz úshin mańyzdy oqıǵalarǵa toly boldy. Bir ǵana EKSPO-nyń ótkizilýin alsaq, ol aıtarlyqtaı jaǵymdy áserin qaldyrdy. Bul týraly memleket basshysy da, kórmeni aralaǵan qarapaıym turǵyndar da aıtty. Buǵan qosa, bizdiń qoǵamda qazaq tilin latynǵa kóshirý, Ábý-Dabı Plazadaǵy oqıǵa, jańa oqýlyqtar jáne medıtsınalyq saqtandyrý máselesi qyzý talqylandy. Bul máselelerge toqtalmaı-aq qoıaıyn, sebebi, olar barynsha keńinen talqylandy»,- dep málimdedi Dáýren Abaev.

Óz sózinde mınıstr ótken jazdyń eń eleýli oqıǵasynyń biri - Astanadaǵy Islam Yntymaqtastyǵy Uıymynyń (IYU) sammıtine aıryqsha nazar aýdardy. Onyń aıtýynsha, damyǵan elder úshin de mundaı aýqymdaǵy basqosýdy ótkizý asa kúrdeli mindet. «83 eldiń delegatsısyn jınap, mundaı sammıt ótkizý - eń qýatty memleketter úshin de asa kúrdeli is. Bul jerde barlyq memlekettik organdar men vedomstvolardyń birlesken qyrýar eńbegi qajet. Menińshe, mańyzy jóninen bul sammıt EQYU-nyń sammıtinen asyp tústi. Asyp túspese kem túspegeni aıdan anyq. Óıtken sebebi, EQYU-na múshe elder qaı jaǵynan alsaq ta, ekonomıkalyq damýy men saıası kózqarasy boıynsha bir-birimen teń dárejede. Al kúlli ıslam áleminiń basyn bir jerge qosýǵa tek memleket basshysy Nursultan Nazarbaevtyń baq-bedeliniń arqasynda ǵana múmkin boldy. 83 delegatsııanyń 15-in memleket basshylary bastap keldi. Munyń ózi atalǵan sharanyń óte mańyzdylyǵyn kórsetti»,- dep atap ótti mınıstrlik basshysy.

Dáýren Abaev ıslam álemi elderiniń ekonomıkalyq damý deńgeıi boıynsha asa baı jáne óte kedeı bolyp bólinetinin tilge tıek etip, olardyń basyn bir alańǵa toǵystyrý úlken qajyrly eńbektiń nátıjesi ekenin aıtty. «Memleket basshysy osy sammıtte - ǵylym, ınnovatsııalar jáne ıslam álemin jetildirý degen taqyrypty kóterdi. Qazirgi tańda ıslam álemin radıkaldanýda dep aıyptaıtyny qupııa emes. Osy turǵyda 83 delegatsııa talqyǵa salǵan taqyryptar aıryqsha mańyzdy. Menińshe, Astanada qabyldanǵan deklaratsııa barsha ıslam álemin damytýǵa shynaıy qadam jasaýǵa yqpalyn tıgizedi»,- dep túıindedi sózin mınıstr.

Sonymen qatar, mınıstrlik basshysy «Tsıfrly Qazaqstan» baǵdarlamasyn jetildirýge birer aılar kerektigin málim etti. «Tsıfrly Qazaqstan» qazir úlken mańyzǵa ıe bolýda. Sizder bilesizder, jyldyń basynda memleket basshysy óziniń joldaýynda muny atap kórsetip, bizdiń aldymyzǵa naqty mindetter júktedi. Osy kezge deıin biz halyqaralyq keńesshilermen birge osy máseleni tııanaqty túrde pysyqtadyq»,-dep habarlady Dáýren Áskerbekuly. Onyń aıtýynsha, baǵdarlama 2017 jyldyń sońynda qabyldanady. «Memleket basshysy jańa nárselerdi kórip, baǵdarlamany jetildirýge bizge qosymsha ýaqyt berdi. Budan ol tıimdirek bola túsedi»,- dep túsindirdi ol.