Dáýren Abaev: Ókinishke qaraı teris mazmundaǵy saıttar myńdap ashylyp jatyr

ASTANA. QazAqparat - Memlekettiń zańnamanysyna qaıshy keletin saıttardy anyqtaýǵa táýlik boıy monıtorıng júrgizilip jatyr. Bul týraly Májiliste QR Aqparat jáne kommýnıkatsııalar mınıstri Dáýren Abaev málim etti, dep habarlaıdy QazAqparat.

Májilis depýtaty Káribaı Musyrman mınıstrden teris mazmundaǵy saıttarǵa tyıym salý sharalary týraly surady.

«Memlekettiń zańnamasyna qaıshy keletin saıttardyń barlyǵyn jaýyp jatyrmyz. ıAǵnı myńdaǵan saıttyń jumysyn toqtattyq, sondaı-aq áleýmettik jelilerdegi pablıkterdi japtyq. Osydan eki-úsh aı buryn balalardy sýıtsıdke ıtermeleıtin saıtar men pablıkter paıda bolǵan kezde tıisti sharalardy qoldandyq»,-dep toqtaldy mınıstr.

Osy oraıda Abaev mınıstrliktiń saıtyna turǵyndardy tolǵandyrǵan máseleler boıynsha tıisti siltemelerdi jiberse, qajetti tekserýler mindetti túrde júrgiziletinin atap ótti.

«Myńdap japqanymyzben, ókinishke qaraı ondaı saıttar myńdap ashylyp jatyr. Bul protsesti toqtatý óte qıyn, biraq osy jumystar aıasynda táýlik boıy arnaıy monıtorıng júrgizemiz»,-dedi vedomstvo basshysy.

Aıta keteıik, Májiliste «Qazaqstan Respýblıkasynyń keıbir zańnamalyq aktilerine aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly» zań jobasy tanystyryldy. Zań jobasy aıasynda 4 kodeks pen 12 zań jobasyna 200-den astam túzetýler enigizý josparlanyp otyr.