Dáýren Abaev: Monoqalalardy basqarý prıntsıpi ózgerýi tıis

NUR-SULTAN. QazAqparat – QR Prezıdent ákimshiligi basshysynyń birinshi orynbasary Dáýren Abaev elimizdegi monoqalalardyń taǵdyryna qatysty óz pikirin bildirdi, dep habarlaıdy QazAqparat tilshisi.

«Monoqalalar Keńes dáýirinen qalǵan mura desek bolady jáne ol qalalar josparly ekonomıka saıasatyna saı qurylǵan. Táýelsizdik alǵaly zaman ózgerdi, tıisinshe monoqalalardy basqarý prıntsıpi de ózgerýi tıis. Búgingi tańda monoqalalardyń problemasy kóp. Qazirgi ýaqytta elimizde 27 monoqalada 1,5 mln adam turyp jatyr. Ol qalalardyń búgingi sıpaty halyqtyń jappaı kóshýi, áleýmettik depressııa, jumyssyzdyq ta bar. Oǵan azyp-tozǵan kommýnaldyq ınfraqurylymdy qosyńyz», - dedi Dáýren Abaev «Habar» telearnasynda ótken «Ashyq dıalog» suhbatynyń kezekti sanynda.

Onyń aıtýynsha, keıbir monoqalalardy asyrap otyrǵan tabıǵı resýrstar qory azaıyp barady.

«Sondyqtan Prezıdent máseleni búginnen qolǵa alyp, bolashaǵy joq monoqalalardyń turǵyndaryn iri qalalarǵa kóshirýdi usynyp otyr. Árıne, ol úshin aldymen jaǵdaı jasaý kerektigin umytpaǵan jón. Biraq turǵyndardy kóshirý máselesi barlyq monoqalalarǵa qatysty emes. Damý bolashaǵy zor monoqalalar da bar. Áleýeti bar qalalar úshin arnaıy damý jospary qabyldanyp, ásirese ekonomıkasyn ártaraptandyrý baǵyty boıynsha shara qolǵa alynady. Keıbir monoqalalar iri qalalardyń mańynda ornalasqan, ondaı qalalar aglomeratsııa prıntsıpi boıynsha órkendeı túsetin bolady», - deıdi ol.

Sondaı-aq, QR Prezıdent ákimshiligi basshysynyń birinshi orynbasary Memleket basshysy monoqalalarǵa qatysty aýqymdy taldaý jumysyn júrgizýdi tapsyrǵanyn aıtty.

Taldaýdyń nátıjesinde monoqalalar sanatqa bólinip, ol týraly BAQ betterinde habarlanatyn bolady.