Dáýren Abaev memlekettik tildi kemsitken joq – Erlan Qarın
«Kesheden beri áleýmettik jelide áriptesim ári joldasym Dáýren Abaevtyń málimdemesine qatysty túrli pikir aıtylyp jatyr. Men Dáýren Áskerbekulymen biraz jyl qyzmettes boldym. Biz Prezıdent Ákimshiligine deıin de aqparat salasynda birge jumys istedik. Onyń memleketshil ári ulttyq múddege berik azamat ekenin jaqsy bilemin. Sondyqtan, aıtylyp jatqan máselege beı-jaı qaramaı, oǵan óz pikirimdi bildirgendi jón kórdim.
Birinshiden, keshegi suhbatty muqııat kórip shyqsańyz, Dáýren myrza memlekettik tildi múldem kemsitip otyrǵan joq, ulttyq múddemizdi de eshkimge jyǵyp bergen joq. Ol Qazaqstandaǵy orys tiliniń ahýalyn túsindirip, oǵan qysym jasalyp jatyr degen paıymnyń orynsyz ekenin anyq ári dáıekti túrde jetkizdi.
Ekinshiden, meniń áriptesim qyzmet babyna oraı, soltústiktegi kórshi elde bolyp jatqan aqparattyq dúrbeleńge baılanysty memlekettik bıliktiń ustanymyn bildirdi. Bul ustanym bárińizge belgili – Qazaqstanda tiline, nanym-senimine bola adamdy kemsitýge jol berilmeıdi. Munymen de eshkim daýlasa qoımaıtyn shyǵar.
Úshinshiden, Dáýren Abaev jalpy ultshyldyqty qoǵamdyq qubylys retinde joqqa shyǵaryp, synaǵan joq. Onyń meńzep otyrǵany – ásire ultshyldyqtyń kórinisteri. Munyń týǵan eli men jerin súıetin patrıot azamattardyń ultshyldyǵyna esh qatysy joq. Al, saıası jáne qoǵamdyq ıdeologııada qandaı da ásire kózqaras pen is-áreketten árıne saq bolǵan jón.
Meniń oıymsha bizdegi ultshyldyq memleketshildikpen astasyp jatýy qajet»,-dep jazdy, Memleket basshysynyń kómekshisi óziniń Facebook áleýmettikjelidegi paraqshasynda.
Osy rette ol qoǵamdyq is-áreketimizdiń ólshemi memleketshildik bolýǵa tıis ekendigin aıtady. Ultyn súıgen adam, eń aldymen, memleketiniń bolashaǵyn oılaýy jáne soǵan qyzmet etýi kerek.
«Biz qoǵamdyq dıskýssııada jalań urannan tereń ári baıypty dıalogqa kóshýimiz kerek. Sondyqtan, barshańyzdy sońǵy pikirtalasqa sabyrmen qarap, áriptesim Dáýren Abaevtyń málimdemesiniń mánine tereń úńilýge, ony durys túsinýge shaqyramyn»,-dedi Erlan Qarın.