Dáýren Abaev: «Qos bılik» týraly daqpyrtty talqylaı berýdiń reti joq

NUR-SULTAN. QazAqparat – Qazaqstandaǵy qos bılik jaıly daqpyrtty talqylaı berýdiń esh reti joq. «Aqparat jáne qoǵamdyq damý mınıstri Dáýren Abaev Habar» arnasyndaǵy «Ashyq dıalog» baǵdarlamasynda osylaı dedi, dep habarlaıdy QazAqparat tilshisi.

«Qazaqstandaǵy eki bılik» degen daqpyrt basyldy dep oılaǵan edim. Bul máseleni talqylaı berýdiń qajeti joq. Bizde zańdy túrde saılanǵan Prezıdent bar. Oǵan Qazaqstandaǵy halyqtyń 74 paıyzy daýys berdi. Al bul degenińiz – bizdiń elimizdegi 6,5 mln adam degen sóz. Qazirgi tańda Konstıtýtsııamen bekitilgendeı Prezıdentte tolyqqandy barlyq quziret bar. Azamatttardyń orasan zor senim mandaty, Elbasynyń qoldaýy bar. Qos bılik týraly daqpyrtty talqylaı berýdiń retin kórmeı turmyn. Kelisip alý – taǵaıyndaý emes. Memleket basshysy taǵaıyndaıdy. Sondyqtan, joq jerden áńgime shyǵarýdyń qajeti joq», - dedi Dáýren Abaev.

Eske sala ketsek, QR Prezıdentiniń baspasóz hatshysy Berik Ýálı Memleket basshysynyń 2019 jylǵy 9 qazandaǵy «Qazaqstan Respýblıkasy Prezıdentiniń keıbir aktilerine ózgertýler men tolyqtyrýlar engizý týraly» Jarlyǵyna túsinikteme bergen bolatyn.